İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 497 Hüküm no: 446 Orijinal metin no: [84a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi zimmînin babasından kalan kasab gediği hissesini, Yani v. İstavri ile Kosta v. Yani’ye devrettiği Kasab intikāl ve ferâğı Ma‘rûz Hudâvendigâr-ı esbak cennet-mekân firdevs-âşiyân Sultân Abdülhamid Han -tâbe serâhu- hazretleri evkāf-ı celîlelerinden Yedikule hâricinde kâin gayrı-ez selhhâne-i mîrî on aded ganem selhhânelerinden yedinci selhhâneye merbût kasab dükkânlarından Üsküdar’da Atpazarı’nda Kapıaltı nâm mahâlde kâin bir bâb kasab dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin sülüs hisse-i şâyi‘asına mutasarrıf olan Yorgi v. Dimitri zimmî hâlik olup hisse-i mezkûre sulbî kebîr oğlu Yorgi’ye intikāl eylediği kassâbân kethudâsı el-Hâc Hasan Ağa ve sâir kasab ustaları ihbârlarıyla zâhir ve mütehakkık oldukdan sonra mersûm Yorgi zimmî meclis-i şer‘-i münîrde Yani v. İstavri ve Kosta v. Yani zimmîler muvâcehelerinde takrîr-i kelâm edip ben ber-vech-i muharrer bi’l-intikāl mutasarrıf olduğum sülüs hisse-i mezkûremi hüsn-i rızâ ve tayyib-i hâtırım ve ferâğ-ı mu‘teber-i kat‘î ile bedel-i ma‘lûm ve makbûz mukābelesinde bâ-re’y-i mütevellî mersûmân Yani ve Kosta zimmîlere alâ-iştirâki’s-seviy ferâğ ve tefvîz ve vech-i lâyıkı üzre teslîm eylediğimde onlar dahi ber-vech-i muharrer tefevvüz ve kabûl etmeleriyle fîmâ-ba‘d hisse-i mezkûre mersûmânın iştirâk-i seviy üzre dâhil-i havza-i tasarrufları olup benim alâkam kalmamışdır deyü ba‘de’t-takrîr ve’t-tasdîk sülüs hisse-i mezkûre hâlik-i mersûm üzerinden ref‘ ve terkīn ve defter-i vakf-ı şerîfde mersûmân Yani ve Kosta zimmîler isimlerine kayd ile atîk temessükleri mukaddemâ zâyi‘ olmuş olduğundan müceddeden temessük i‘tâsını istid‘â eyledikleri İstanbul Mahkemesi’nden huzûr. Fî 21 min-Z sene [1]242 [Beyaz Beyaz Beyaz]