İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 498 Hüküm no: 447 Orijinal metin no: [84b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Derviş Mehmed Emin Ağa ile kardeşinin, Abdüllatif Ağa’yı dükkânını kiraya vermeye zorlayamayacakları Kahvehâne men‘i ve teberru‘an 100 guruş teslîm ve ibrâ Ma‘rûz Sahib-i arzuhâl el-Hâc Derviş Mehmed Emin Ağa ve li-ebeveyn er karındaşı Mehmed Tahir Ağa ibney Hüseyin nâm kimesneler meclis-i şer‘-i münîrde derûn-ı arzuhâlde ismi mezkûr Abdüllatif Ağa b. Osman muvâcehesinde İstanbul’da Salmatomruk kurbünde Ka‘riye-i Atîk Ali Paşa mahallesinde camcı dükkânı ittisâlinde kâin merkūm Abdüllatif Ağa’nın bi’l-icâreteyn mutasarrıf olduğu bir bâb kahvehâne derûnunda mevcûde hevâî gedik ta‘bîr olunur ma‘lûmü’l-aded kahve ibriği ve fincân ve zarf ve tütün çubuğu ve sâir âlât-ı ma‘lûme nısfiyet üzre mâlımız olarak derûnunda sâkinler iken bundan akdem sâir mecmû‘-ı kahvehâneler ile ma‘an bâ-fermân-ı âlî sedd ü bend ve ocağı hedm olunup ol dahi fesh-i akd-i îcâr ile bizi dükkân-ı merkūmdan ihrâc ettikde biz dahi mâlımız olan âlât-ı mezkûreyi tamamen alıp hurûc etmişdik lâkin mücerred mukaddemâ hevâî gediği bizim olduğuna binâen yine bize îcâr edip biz dahi dilediğimiz vech üzre tasarruf ve isti‘mâl üzre merkūm Abdüllatif Ağa’ya cebr olunmak murâdımızdır deyü îrâd eylediğimiz kelâmımız şer‘an mesmû‘a olmadığı bize tefhîm olunup ancak merkūm Abdüllatif Ağa bize mâlından teberru‘an yüz guruş def‘ ü teslîm ve umûrumuza sarfla istihlâke emreylediğinde biz dahi ahz ve emri üzre umûrumuza sarfla istihlâk etmemizle bi’l-cümle hukūk-ı şer‘iyeye müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve ıskāt eyledik deyü ikrâr ve tesâdukları İstanbul Mahkemesi’nden huzûr-ı âlîlerine i‘lâm olundu. Fî 17 min-Zilka‘deti’ş-şerîfe sene 1242