İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 498 Hüküm no: 448 Orijinal metin no: [84b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yani v. Menalo’nun, Ebubekir Efendi b. Halil zimmetinde 164 guruş alacağı olduğu Menzil müfredâtı keşfi Ma‘rûz Sâdır olan fermân-ı âlîlerine imtisâlen zikri âtî husûsu mahâllinde lede’l-mu‘âyene keşf ve tahkīk için savb-ı şer‘-i enverde[n] me’zûnen irsâl olunan Kâtib es-Seyyid Ahmed Efendi dâ‘îleri [ve] hâssa mi‘mârı hulefâsından İsmail Kemâlî ve Ahmed Halîfeler ile İstanbul’da Hocapaşa mahallesinde kâin zikri âtî münâza‘un-fîh olan menzile varıp huzûr-ı Müslimînde akd-i meclis-i şer‘-i âlî ettikde sahib-i arzuhâl neccâr tâifesinin Midilli kolu neferâtından Yeniköylü Yani v. Menalo nâm zimmî meclis-i ma‘kūd-ı mezkûrda derûn-ı arzuhâlde mezkûru’l-ism A‘mâ Ebûbekir Efendi b. Halil nâm kimesne muvâcehesinde mezbûr Ebûbekir Efendi’nin işbu derûnunda akd-i meclis-i şer‘-i âlî olunan ma‘lûmü’l-hudûd mülk arsası üzerine mezbûrun bi-şartı’r-rücû‘ emri ve beher zirâ‘ı kırk ikişer guruş mukāvelesi ile mi‘mârân-ı mezbûrân misâhalarıyla terbî‘an seksen üç zirâ‘ ebniye inşâ etmemle hesâb-ı mezkûr üzre masrûfum olup bi’l-mürâca‘a alacağım olan üç bin dört yüz iki guruşun ceste ceste üç bin iki yüz doksan guruşunu ahz etmemle bâkīsi olan yüz on iki guruş ile hâric-ez mukāvele masrûfum olan elli iki guruş ki cem‘an yüz altmış dört guruşu mezbûr Ebûbekir Efendi meclis-i ma‘kūd-ı mezkûrda bana edâ ve teslîm ben dahi yedinden ahz ü kabz ve tamamen istifâ-yı hak etmemle bi’l-cümle husûs-ı mezkûra ve ziyâde masrûf müdde‘âsına ve sâire müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve ıskāt eyledik deyü ikrâr ve tasdîklerini kâtib-i merkūm mahâllinde ketb ü tahrîr ve ma‘an meb‘ûs ümenâ-i şer‘le meclis-i şer‘a gelip alâ-vukū‘ihî inhâ ve takrîr eylediği İstanbul Mahkemesi’nden huzûr-ı âlîlerine i‘lâm olundu. Fî 25 min-Z sene 1242