İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 499 Hüküm no: 449 Orijinal metin no: [84b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mıgırdıç v. Abraham ve eşinin, İbrahim Ağa b. Ömer ve eşi ile 600 guruşa sulh olduğu 600 guruşa sulh ve menzil ferâğı Ma‘rûz Kendiden asîl ve zevcesi Emine bt. el-Hâc Ahmed nâm hatun tarafından husûs-ı âtîde vekîl olduğu zât-ı mezbûreyi ârifân Mehmed Şâkir Efendi b. Mehmed ve Ahmed Ağa b. Salih nâm kimesneler şehâdetleriyle sâbit olan sahib-i arzuhâl es-Seyyid el-Hâc İbrahim Ağa b. es-Seyyid Ömer bi’l-ma‘iyye rü’yete me’mûr nezâret-i hazret-i şeyhülislâm-ı sellemehü’s-selâmîde âsûde evkāf müfettişi müderrisîn-i kirâm-ı zevi’l-ihtirâmdan Meşreb Efendi hafîdi fazîletlü Mehmed Ârif Efendi tarafından mürsel Kâtib Hasan Efendi dâ‘îleri ma‘iyyetiyle akd olunan meclis-i şer‘-i münîrde derûn-ı arzuhâlde mezkûru’l-isim Derzi Mıgırdıç v. Abraham zimmî muvâcehesinde mersûmun zevcesi şahsı mu‘arrefe Oskohi bt. Mardiros Nasrâniye ile nezâret-i hazret-i müşârün-ileyhde âsûde evkāfdan İstanbul’da Sultân Selim nezdinde Çukurbostan derûnunda kâin merhûm Hatîb Muslihiddin Mustafa Efendi Câmi‘-i Şerîfi Vakfı’nın bi’l-meşrûta mütevellîsi Şerife Fâtıma Hanım bt. Mehmed tarafından mürsel vekîli câbî-i vakf Mahmud Efendi b. İsmail hazır olduğu hâlde mersûm Mıgırdıç zimmî ile kayınanası Şanzar bt. Ağyazar Nasrâniye vakf-ı mezkûr müstagallâtından İstanbul’da Gedikpaşa Hamamı külhânı karşısında kâin ma‘lûmü’l-hudûd bir bâb menzillerini bin iki yüz otuz yedi senesi Zilhicceti’ş-şerîfe gurresinde zevcem müvekkilem <> mersûmeye ferâğ eder oldukda yalnız mersûm Mıgırdıç zimmînin benim kendi mâlımdan kabz eylediği bin guruşu her ne zaman bana <> eder ise müvekkilem mersûmedahi menzil-i mezkûru mesfûrâna geri red ve ferâğ etmek şartıyla bâ-re’y-i mütevellî vefâen ferâğ ve tefvîz ve teslîm eylediğinde ol dahi şart-ı mezkûr ile tefevvüz ve kabûl ettikden sonra mersûme Şanzara Nasrâniye bundan akdem hâlike olup menzil-i mezkûrdan mutasarrıfe olduğu nısf hissesi sadriye kızı hâzıra-i mersûme Oskohi Nasrâniyeye âdiyen intikāl etmekle deyn-i meblağ-ı mezkûr bin guruşu bana edâ ile menzil-i mezkûru tahlîse mersûm Mıgırdıç zimmîye tenbîh olunmak matlûbumdur deyü da‘vâya tesâddî eylediğimde mersûm Mıgırdıç zimmî meblağ-ı mezbûr bin guruşu târih-i mezkûrda vech-i meşrûh üzre iktirâzını kendi bi’n-nefs menzil-i mezkûru dahi şart-ı mezkûr ile ferâğ eylediklerini zevce-i hâzıra-i mersûme ile ma‘an ikrâr ve tasdîk edip ancak ben meblağ-ı mezbûr için târih-i mezkûrdan beri bilâ-devr murâbaha nâmıyla altı yüz altmış sekiz guruş vermişdim deyü inkârıma mukārin da‘vâ ve ol vechile beynimizde ba‘de’l-münâza‘a beynimiz ıslâh olunup ben meblağ-ı merkūm bin guruş müdde‘âmdan mersûm Mıgırdıç zimmî ile bi’t-tav‘ ve’r-rızâ altı yüz guruş bedel-i medfû‘ ve makbûza sulh ve menzil-i mezkûru bâ-re’y-i mütevellî mersûm Mıgırdıç zimmî ile zevcesi hâzıra-i mersûme Oskohi Nasrâniyeye nısfiyet üzre bi’l-vekâle ferâğ ve tefvîz ve vech-i lâyıkı üzre teslîm eylediğimde ol dahi sulh-ı mezkûru kabûl ve menzil-i mezbûru dahi ikisi ma‘an ber-vech-i meşrûh tefevvüz ve tesellüm ve kabûl etmeleriyle bi’l-cümle husûs-ı mezkûra ve sâir cemî‘ hukūk-ı şer‘iyeye müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve ıskāt eyledik deyü asîl ve vekîl-i mezbûr es-Seyyid el-Hâc İbrahim Ağa’nın bi’l-cümle takrîr-i meşrûhunu mersûm Mıgırdıç zimmî ile zevcesi hâzıra-i mersûme Oskohi Nasrâniyeden her biri tasdîk ve mütevellî vekîli hâzır-ı merkūm dahi menzil-i mezkûru ber-vech-i muharrer zevcân-ı mesfûrânın nısfiyet üzre tasarruflarını bi’l-vekâle re’y edip külliyyen kat‘-ı nizâ‘ eyledikleri İstanbul Mahkemesi’nden huzûr. Fî 27 min-Z sene 1242 [Beyaz Beyaz]