İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 501 Hüküm no: 450 Orijinal metin no: [85a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rumeli’den gelen 2411 baş sığırın dağıtımı ve fiyatlarının tespiti 2411 re’s sığır tevzî‘i Ma‘rûz Âsitâne-i aliyye -sânehallâhu te‘âlâ ani’l-âfât ve’l-beliye-’de sâkin ibâdullâh için işbu sene-i mübârekede bu def‘a sığır sevk ve tesyîr eden sürek çelebi [celebi] tâifesinden üç yüz beş re’s sığır sahibi Karışdıranlı Mustafa Ağa ve üç yüz otuz beş re’s sığır sahibi Çavuş oğlu Ali ve yüz altmış altı re’s sığır sahibi Bergoslu Tahir Ağa ve yüz elli beş re’s sığır sahibi Bergoslu Molla Salih ve yüz yetmiş re’s sığır sahibi Kırk Kenîseli Dirgi ve yüz re’s sığır sahibi Kırk Kenîseli Yuda Yahûdî ve yüz otuz re’s sığır sahibi Kara Beriko ve doksan re’s sığır sahibi Kiremidci Todori ve yüz altmış re’s sığır sahibi Üsküblü Hani ve yüz re’s sığır sahibi Üsküblü Togodoş ve yedi yüz re’s sığır sahibi Tetovanlı Kılo zimmîden her biri meclis-i şer‘-i enverde hâssa kasabbaşısı dergâh-ı mu‘allâ kapıcıbaşılarından sa‘âdetlü Mustafa Ağa tarafından mürsel Mehmed Ağa b. Ali hazır olduğu hâlde sığır kasabları kethudâsı el-Hâc İbrahim Ağa muvâcehesinde sığır kasabları ustalarından el-Hâc Mehmed Derviş Ağa ve İsmail Ağa ve Osman ve Galatalı Hasan ve Tophâneli Salih ve Emir Ali ve Mercanlı Hüseyin nâm kimesneler ile ve Beşiktaşlı Milo zimmî ve Yahûdî tâifesinden Mosi ve Hasköylü Lefteri ve Simiryo Yahûdiler hazır oldukları hâlde işbu sene-i mübârekede Rumeli cânibinde vâki‘ zikrolunan mahallerden her birimiz ber-vech-i muharrer müteferrikan Âsitâne-i aliyyeye sevk ve tesyîr eylediğimiz cem‘an iki bin dört yüz on bir re’s sığırlarımızın lühûmunun beher vakıyyesini lahm-ı ganemin râyic fiyâtının sülüsânına ve iç yağının beher vakıyyesini elli beşer buçuk akçeye ve sakatlarını kasabbaşı ağa-yı mûmâ-ileyh ma‘rifetiyle bu def‘a bi’t-terâzî kat‘ olunan altmışar paraya sığır kasabları mezbûrûna bey‘a ta‘ahhüd eylediğimizde onlar dahi ber-vech-i muharrer şirâya ve şehr-i sâbık Zilhicceti’ş-şerîfesinin on altıncı günü târihiyle müverrah bir kıt‘a i‘lâm nâtık olduğu üzre mukaddemâ tevzî‘ olunan <> sığırdan haftada birer ve ba‘dehû bu def‘a dahi tevzî‘ olunan sığırdan birer sürek tevzî‘ etmek <<üzre>> ve yevm-i tevzî‘inden kırk bir gün tamamında mikdâr-ı fiyâtını mübeyyin yaftalarını yedlerimize vermek ve altmış bir gün tamamında haklaşmak üzre kethudâ-yı merkūm ve lühûmunun beher vakıyyesini altışar akçe ticâret zammıyla narh-ı cârîsi üzre ibâdullâha bey‘a esnâf-ı hâzırûn-ı merkūmûn ta‘ahhüd eylediler deyü tarafeynin takrîr ve tasdîkleri tescîl ve İstanbul Mahkemesi’nden huzûr-ı âlîlerine i‘lâm olundu. Fî 24 min-Z sene 1242