İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 502 Hüküm no: 451 Orijinal metin no: [85a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Melkon v. Asador ile kardeşi Kigork’un, uncu değirmeni hisselerini Şehrî Ahmed b. Ahmed’e sattıkları Uncu değirmeni mübâya‘ası ve ismine kaydı Ma‘rûz Âsitâne-i aliyyede vâki‘ uncu esnâfından Melkon v. Asador zimmî kendi nefsinden asâleten ve li-ebeveyn er karındaşı Kigork zimmî tarafından husûs-ı âtîde vekîl olduğu esnâf-ı merkūme kethudâsı Abdülbaki Ağa b. Mustafa ve Uncu Osman Ağa b. Ali nâm kimesneler şehâdetleriyle sâbit olmağla vekâleten meclis-i şer‘-i münîrde yine esnâf-ı merkūmeden Şehrî Ahmed b. Ahmed nâm kimesne muvâcehesinde bi’l-asâle ve bi’l-vekâle takrîr-i kelâm edip İstanbul’da Yenibağçe kurbünde Keçeciler Hamamı’na muttasıl uncu değirmenine sonradan naklolunan bir horos ta‘bîr olunur bâ-sûret iştirâken ve şâyi‘an mâlik olduğumuz dört re’s bargir ve sâir âlât-ı lâzıme-i ma‘lûmeyi tarafeynden bi’l-îcâb ve’l-kabûl bâtten ve sahîhan bi-safkatin vâhidetin bin dokuz yüz guruş semen-i makbûza bi’l-asâle ve bi’l-vekâle merkūm Ahmed’e bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl edip mebî‘-i mezkûrun tağrîr ve gabnine müte‘allika <<âmme-i>> da‘vâdan tarafeynden her birimiz âharın zimmetini bi’l-asâle ve bi’l-vekâle kabûlü hâvî ibrâ ve ıskāt eyledik fîmâ-ba‘d zikrolunan bir horos ta‘bîr olunur dört re’s bargir ve sâir âlât-ı ma‘lûme merkūm Ahmed’in mal-ı müşterâsı ve hakk-ı sırfı olup benim ve karındaşım müvekkilim mersûm Kigork zimmînin alâkamız kalmamışdır deyü ba‘de’l-ikrâr ve’t-tasdîk zikrolunan bir <> horos uncu taşının mahâll-i mezbûrda lüzûmu olmadığından kasaba-i Kasımpaşa’da matbah ardında kâin mâlik olduğu bir horoslu uncu değirmenine nakl ile isim ve mahâll-i evvelini kaydlarını terkīn ve mahâll-i sânî-i mezbûr iki horoslu bir kıt‘a uncu değirmeni olmak üzre kalemine kayd ile ismine tashîhan sûret i‘tâsını merkūm Ahmed istid‘â ve ber-vech-i <> istid‘â nakl ve sûret i‘tâsı muvâfık-ı şurût-ı nizâm olduğunu kethudâ ve esnâf-ı merkūmûn ihbâr ve inhâ etmeleriyle bu sûretde ber-mûceb-i istid‘â nakl ve ismine tashîhan kayd ile sûret i‘tâsı iktizâ eylediği İstanbul Mahkemesi’nden huzûr. Fî 18 min-Z sene 1242