İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 502 Hüküm no: 452 Orijinal metin no: [85a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikola zimmînin, babasından intikal eden kasap gediklerini Yani v. Niko ile Yani v. Dimitri’ye devrettiği Kasab gediği ferâğı Ma‘rûz Hudâvendigâr-ı esbak cennet-mekân Sultân Abdülhamid Han -tâbe serâhu- hazretleri evkāf-ı celîlelerinden Yedikule hâricinde kâin gayrı-ez selhhâne-i mîrî on aded ganem selhhânelerinden ikinci selhhâneye merbût kasab dükkânlarından Tophâne’de atîk sebîl ve çeşmeye muttasıl bir bâb ve çörekçi fırını karşısında bir bâb ve Boğazkesen nâm mahâlde bir bâb ki cem‘an üç bâb kasab dükkânı gediği ta‘bîr olunur âlât-ı lâzıme-i ma‘lûmenin her birinden birer rubu‘ hisseleri ve beşinci selhhâneye merbût kasab dükkânlarından kasaba-i mezbûrede Yağhâne önünde bir bâb kasab dükkânı gediği ta‘bîr olunur âlât-ı lâzıme-i ma‘lûmenin rubu‘ ve sümün hissesi ve Gürciata dükkânı demekle ma‘rûf bir bâb kasab dükkânı gediği ta‘bîr [olunan]âlât-ı lâzıme-i ma‘lûmenin nısf ve rubu‘ hissesi ve mahkeme köşesinde vâki‘ bir bâb kasab dükkânı gediği ta‘bîr olunur âlât-ı lâzıme-i ma‘lûmenin sümün hissesine bi’l-icâreteyn mutasarrıf olan Kasab Yani v. Kosta zimmî hâlik olup hısas-ı mezkûre sulbî kebîr oğlu Nikola zimmîye âdiyen intikāl eylediği kasablar kethudâsı el-Hâc Hasan Ağa ve sâir kasab ustaları ihbârlarıyla zâhir oldukdan sonra mersûm Nikola zimmî meclis-i şer‘-i münîrde Kasab Yani v. Niko zimmî ile diğer Yani v. Dimitri zimmîler muvâcehelerinde takrîr-i kelâm edip ben ber-vech-i muharrer bi’l-intikāl mutasarrıf olduğum zikrolunan çeşme ittisâlinde ve fırın karşısında ve Boğazkesen’de vâki‘ dükkân gediğinin sümün hissesini bâ-re’y-i mütevellî bedel-i ma‘lûm ve makbûz mukābelesinde mersûm Yani zimmîye ve zikrolunan üç bâb dükkân gediklerinin birer rub‘undan nısf-ı âharlarını ve Yağhâne önü dükkânı gediğinin rubu‘ hissesini ve zikrolunan üç bâb dükkân gediğinden nısf ve rubu‘ hisselerini kezâlik bâ-re’y-i mütevellî bedel-i ma‘lûm ve makbûz mukābelesinde mersûm diğer Yani zimmîye hüsn-i rızâ ve tayyib-i hâtırım ve ferâğ-ı mu‘teber-i kat‘î ile ferâğ ve tefvîz ve vech-i lâyıkları üzre teslîm eylediğimde onlar dahi tefevvüz ve kabûl etmeleriyle fîmâ-ba‘d hısas-ı şâyi‘a-i mezkûre mersûmânın vech-i meşrûh üzre dâhil-i havza-i tasarrufları olup benim alâkam kalmamışdır deyü ba‘de’l-ikrâr ve’t-tasdîk hısas-ı mezkûre defter-i vakf-ı şerîfde vech-i meşrûh üzre mersûmân uhdelerine kaydile yedlerine başka başka iki kıt‘a cedîd temessük i‘tâsını istid‘â eyledikleri İstanbul Mahkemesi’nden huzûr. Fî 2 min-Z sene 1242