İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 506 Hüküm no: 454 Orijinal metin no: [85b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud Ağa b. Mehmed’in, kasap gediği hissesini İbrahim b. Ahmed ile Hristo v. Margırit’e devrettiği Ferâğ-ı gedik-i kasab Ma‘rûz Hudâvendigâr-ı esbak cennet-mekân Sultân Abdülhamid Han -tâbe serâhu- hazretleri evkāf-ı celîlelerinden Yedikule hâricinde kâin gayrı-ez selhhâne-i mîrî on aded ganem selhhânelerinden ikinci selhhâneye merbût kasab dükkânlarından medîne-i Üsküdar’da Yeniçeşme nâm mahâlde vâki‘ bir bâb kasab dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin sülüs hisse-i şâyi‘asına bâ-temessük-i mütevellî bi’l-icâreteyn mutasarrıf olup vilâyet-i Anadolu’da Eğin kasabasında sâkin Mahmud Ağa b. Mehmed b. Abdullah tarafından husûs-ı âtîde kabûlüne mevkūfe hâlâ kasaba-i mezbûre nâibi es-Seyyid Abdullah Efendi’nin mührü mutâbık bir kıt‘a vekâlet hücceti mantûkunca vekîl olup haber-i vekâlet kendüye vâsıl olıcak kabûl eylediği lede’t-tezkiye adl [86a] ve makbûlü’ş-şehâde idükleri ihbâr olunan kasaba-i mezbûreden bu esnâda Âsitâne-i aliyyeye gelen Nuri b. Hüseyin ve es-Seyyid İsmail b. es-Seyyid Mustafa nâm kimesneler şehâdetleriyle mahzar-ı hasm-ı câhidde hukūk-ı şer‘iye zımnında ber-nehc-i şer‘î sâbit ve sübût-ı vekâletine hükm-i şer‘î lâhık olan Ahmed b. Veliyüddin nâm kimesne meclis-i şer‘-i münîrde İbrahim b. Ahmed nâm kimesne ile Hristo v. Margırit nâm zimmi muvâcehesinde bi’l-vekâle takrîr-i kelâm edip müvekkilim merkūm Mahmud Ağa’nın ber-vech-i muharrer mâlik olduğu sülüs hisse-i şâyi‘asını bâ-hüsn-i rızâ ve tayyib-i hâtır ve ferâğ-ı mu‘teber-i kat‘î ile bedel-i ma‘lûm ve makbûz mukābelesinde bi’l-vekâle merkūm İbrahim Ağa ve mersûm Hristo zimmîye ale’l-iştirâki’s-seviy ferâğ ve tefvîz ve vech-i lâyıkı üzre teslîm eylediğimde onlar dahi ber-vech-i muharrer tefevvüz ve kabûl edip fîmâ-ba‘d sülüs hisse-i mezkûre merkūm İbrahim Ağa ve Hristo zimmînin dâhil-i havza-i tasarrufu olup müvekkilim mezbûrun alâkası kalmamışdır deyü ba‘de’t-takrîr ve’t-tasdîk sülüs hisse-i mezkûre müvekkil-i merkūm Mahmud Ağa üzerinden ref‘ ve defter-i vakf-ı şerîfde merkūmân uhdelerine kayd ile hâmiş-i temessüke tahrîr ve yedlerine i‘tâsını istid‘â eyledikleri İstanbul Mahkemesi’nden huzûr. Fî 21 min-Z sene 1242