İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 507 Hüküm no: 455 Orijinal metin no: [86a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kapatılan arpacı dükkânlarının vasî marifetiyle mallarının satılıp bedellerinin vekillerine teslim edildiği Mefkūd arpacıların Ma‘rûz Âsitâne-i aliyyede ve Kapan-ı dakīk hâric ve dâhilinde vâki‘ bi’l-cümle arpacı esnâfı bundan akdem bâ-emr-i âlî vilâyetlerine i‘zâm olunmuş ve esnâf-ı merkūmenin mahâll-i merkūmda kâin dükkânları sedd ü bend ile mezbûrûnun gerek cânib-i mîrî ve gerek tüccâra olan deynleri ve ba‘zı kesân zimmetlerinde matlûbâtları alâ-hâlihî kalmış olduğundan bahisle merkūmûnun mâlları olup dekâkîn-i mezkûrîn derûnlarında mevcûd zahîreleri ma‘rifet-i şer‘ ve tüccâr ma‘rifetiyle semen-i misilleriyle âhara füruht olunarak semenleri mîrî ve kapan tüccârına olan deynlerine ba‘de’l-edâ fazla kalır ise esnâf-ı merkūme tarafına teslîm olunması bâbında ricâl-i Devlet-i Aliyye’den hâlâ zahîre nâzırı izzetlü Mehmed Ârif Efendi bendelerinin memhûr takrîri bâlâsına unvânı sahh-i âlî ile müveşşah bu dâ‘îlerine hitâben sâdır olan fermân-ı âlîlerine imtisâlen evvelen dekâkîn-i mezkûrînin kuflü ma‘rifet-i şer‘le küşâd olundukdan sonra derûnlarında mevcûd olup kıbel-i şer‘den vasî nasb olan kapan-ı merkūm tüccârından es-Seyyid Veliyüddin Yazıcı karındaşı demekle meşhûr es-Seyyid Ali Ağa b. es-Seyyid Mustafa ve tüccâr ma‘rifetleri ve semen-i misilleriyle âhara bey‘ olunan ma‘lûmü’l-keyl ve’l-fiyât erzen ve kokoroz ve şa‘îr esmânından cem‘an elli sekiz bin beş yüz iki buçuk guruş on dokuz para vasîyy-i mezbûr ile Ali Ağa yedinde olup esnâf-ı merkūmûnun gerek düyûn-ı mezkûre ve gerek matlûbâtı husûsu ber-mûcib-i şerî‘at-i garrâ inde’t-terâfu‘ muvâcehe-i hasm-ı şer‘î lâzımeden olduğuna binâen kendi taraflarından vekîl-i müsbet-i şer‘îleri zuhûruna değin tevkīf olunmuşdu el-hâletü hâzihî esnâf-ı merkūmeden Balı oğlu Ali b. Ahmed ve şerîki Seyfi oğlu Ali b. Hasan nâm kimesneler taraflarından vekâlet-i âmme-i mutlaka ile vekîlleri olduğu arpacı esnâfının kethudâsı Hasan Ağa b. İbrahim ve esnâfından Mehmed Ağa b. Mustafa nâm kimesneler şehâdetleriyle mahzar-ı hasm-ı câhidde şer‘an sâbit ve sübût-ı vekâletine hükm-i şer‘î lâhık olan mezbûr Seyfi oğlu Ali’nin li-ebeveyn er karındaşı Feyzi nâm kimesne meclis-i şer‘-i enverde vasîyy-i mezbûr es-Seyyid Ali Ağa mahzarında kapan-ı mezkûr tüccârı hazır oldukları hâlde müvekkillerim mezbûrânın kapan-ı merkūm hâricinde köşede kâin birbirine muttasıl sâkin oldukları iki bâb arpacı dükkânlarında mevcûd mâlları olup râyic-i vakt üzre beher keyli ellişer paraya olarak ma‘rifet-i şer‘le âhara bey‘ olunan üç yüz keyl şa‘îrin esmânı olan üç yüz yetmiş beş guruş ve beher keyli seksen beşer paraya olarak kezâlik âhara bey‘ olunan dört yüz yetmiş beş keyl şa‘îrin esmânı olan bin dokuz guruş on beş para ki cem‘an vasîyy-i mezbûr Ali Ağa’nın bi’l-vesâye makbûzu olan bin üç yüz seksen dört guruş on beş parayı deyn-i mîrîleri olmadığına binâen düyûn-ı sâirelerini edâ ve bâkī kalır ise kendülere îsâl ve teslîm için tamamen bana def‘ ü teslîm ben dahi bi’l-vekâle yedinden ahz ü kabz edip min-ba‘d meblağ-ı mezkûrdan müvekkillerim mezbûrân Balı oğlu Ali ve karındaşım Seyfi oğlu Ali’nin vasîyy-i mezbûr es-Seyyid Ali Ağa yedinde bir akçe ve bir habbe hakları ve alacakları kalmadı deyü ikrâr ve tasdîkleri İstanbul Mahkemesi’nden huzûr. Fî 10 min-L sene 1242