İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 508 Hüküm no: 456 Orijinal metin no: [86a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Norya’nın, Rafayel Yahudiye doksan bir gün tamamında 3100 guruş borcunu ödeyeceğine taahhüdü 3100 guruşu doksan bir gün tamamında edâya ta‘ahhüd Ma‘rûz Sahib-i arzuhâl şeridci Koprodoro Rafayel nâm-ı diğer Kamal v. Yako Yahûdî meclis-i şer‘-i münîrde derûn-ı arzuhâlde mastûretü’l-ism Norya bt. Artin nâm Nasrâniye muvâcehesinde nezâret-i dâ‘îlerinde olan evkāfdan İstanbul’da Eğrikapı dâhilinde Molla Aşkī Câmi‘-i şerîfinde şeyhü’l-kurrâ ta‘yîn eden ashâb-ı hayrâtdan merhûm el-Hâc Osman Ağa b. Ali Vakfı’nın mütevellîsi es-Seyyid Mehmed Es‘ad Efendi b. es-Seyyid Mustafa Tahir hazır olduğu hâlde ben bin iki yüz otuz dokuz senesi Muharremi’l-harâmı gurresinde mersûme Norya Nasrâniyeye mâlımdan ve yedimden üç bin yüz guruş ikrâz ve teslîm ol dahi ba‘de’l-iktirâz meblağ-ı mezkûr mukābelesinde vakf-ı mezkûr müsakkafâtından Salmatomruk nâm mahâlde Kefevî Kasım Ağa mahallesinde vâki‘ ma‘lûmü’l-hudûd ve’l-müştemilât şehriye otuz akçe icâre-i müecceleli bir bâb menzilini bâ-re’y-i mütevellî bana vefâen ferâğ ve tefvîz ben dahi tefevvüz ve kabûl etmişdim el-hâletü hâzihî meblağ-ı mezkûru bana edâ-birle geri red ve ferâğ olunmak üzre mersûme Norya Nasrâniyeye tenbîh olunmak matlûbumdur deyü da‘vâ eylediğimde ol dahi ber-vech-i muharrer ikrâr ve i‘tirâf ve işbu târihden doksan bir gün tamamına değin tamamen edâya müte‘ahhid oldukdan sonra medyûne-i mersûme Norya Nasrâniyenin oğlu Berber Kigork v. Andriya zimmî meclis-i şer‘de mesfûr Rafayel Yahûdî mahzarında medyûne-i mersûme Norya Nasrâniye hazır olduğu hâlde ben anam hâzıra-i mersûmenin ber-vech-i muharrer mesfûr Rafayel Yahûdiye zimmetinde deyni olan meblağ-ı mezkûr üç bin yüz guruşa tarafeynden bi’l-emr ve’l-kabûl kefâlet-i müeccel[e] ile kefîl ve zâmin olup târih-i mezkûr hitâmında meblağ-ı mezkûru müdde‘î-i mersûma edâya ta‘ahhüd eyledim deyü ikrâr ve tesâdukları İstanbul Mahkemesi’nden huzûr. Fî 29 min-L sene 1242