İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 520 Hüküm no: 472 Orijinal metin no: [88a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kapatılan arpacı dükkânlarının vasî marifetiyle mallarının satılıp bedellerinin vekillerine teslim edildiği Mefkūd arpacıların Ma‘rûz Âsitâne-i aliyyede <>Kapan-ı dakīk hâric ve dâhilinde vâki‘ bi’l-cümle arpacı esnâfı bundan akdem bâ-emr-i âlî vilâyetlerine i‘zâm olunmuş ve esnâf-ı merkūmenin mahâll-i merkūmda kâin dükkânları sedd ü bend ile mezbûrûnun gerek cânib-i mîrî ve gerek tüccâra olan deynleri ve ba‘zı kesân zimmetlerinde matlûbâtları alâ-hâlihî kalmış olduğundan bahisle merkūmûnun mâlları olup dekâkîn-i mezkûrîn derûnlarında mevcûd zahîreleri ma‘rifet-i şer‘ ve tüccâr ma‘rifetiyle semen-i misilleriyle âhara füruht olunarak semenleri mîrî ve kapan tüccârına olan deynlerine ba‘de’l-edâ fazla kalır ise esnâf-ı merkūme tarafına teslîm olunması bâbında ricâl-i Devlet-i Aliyye’den hâlâ zahîre nâzırı izzetlü Mehmed Ârif Efendi bendelerinin memhûr takrîri bâlâsına unvânı sahh-ı âlî ile müveşşah bu dâ‘îlerine hitâben sâdır olan fermân-ı âlîlerine imtisâlen evvelen dekâkîn-i mezkûrînin kuflü ma‘rifet-i şer‘le feth ve küşâd olundukdan sonra derûnlarında mevcûd olup kıbel-i şer‘-i şerîfden vasî nasb olunan kapan-ı merkūm tüccârından es-Seyyid Veliyüddin Yazıcı karındaşı demekle meşhûr es-Seyyid Ali Ağa b. es-Seyyid Mustafa ve tüccâr ma‘rifetleri ve semen-i misilleriyle âhara bey‘ olunan ma‘lûmü’l-keyl ve’l-fiyât erzen ve kokoroz ve şa‘îrin esmânı <>ndan cem‘an elli sekiz bin beş yüz iki buçuk guruş on dokuz para ve vasîyy-i merkūm es-Seyyid Ali Ağa yedinde olup esnâf-ı merkūmenin gerek düyûn-ı mezkûre ve gerek matlûbâtı husûsu ber-mûcib-i şerî‘at-i garrâ inde’t-terâfu‘ muvâcehe-i hasm-ı şer‘î lâzımeden olduğuna binâen kendi taraflarından vekîl-i müsbet-i şer‘îleri zuhûruna değin tevkīf olunmuşdu el-hâletü hâzihî esnâf-ı mezbûreden Horos oğlu Bektaş b. Hüseyin ve üveği oğlu Hasan b. Hüseyin nâm kimesneler taraflarından vekâlet-i âmme-i mutlaka ile vekîl olduğu Kasımpaşa’da Arpacı Hızır Ağa b. Osman ve bu def‘a me’zûnen Âsitâne-i aliyyeye gelen Âşık Mehmed oğlu Yusuf b. Mehmed nâm kimesneler şehâdetleriyle mahzar-ı hasm-ı câhidde şer‘an sâbit ve sübût-ı vekâletine hükm-i şer‘î lâhık olan müvekkilân-ı mezbûrândan merkūm Hasan’ın li-ebeveyn er karındaşı Arpacı Halil ibnü’l-mezbûr Hüseyin meclis-i şer‘-i enverde vasîyy-i mezbûr es-Seyyid Ali Ağa mahzarında kapan-ı merkūm tüccârı hazır oldukları hâlde kapan-ı mezkûr hâricinde Tulumba zukāğında palamud mağazası ittisâlinde müvekkillerim merkūmânın sâkinler oldukları bir bâb arpacı dükkânında mevcûd mâlları olup râyic-i vakt üzre beher keyli yetmiş beşer paraya olarak ma‘rifet-i şer‘le âhara bey‘ olunan cem‘an bin beş yüz otuz keyl şa‘îrin esmânı olup vasîyy-i merkūm es-Seyyid Ali Ağa’nın ber-vech-i muharrer bi’l-vesâye makbûzu olan iki bin sekiz yüz altmış sekiz guruş otuz paranın bin yüz doksan bir guruş otuz dokuz parasını ancak müvekkillerim mezbûrânın cânib-i mîrîye iştirâken ol mikdâr deynleri’çün [88b] emrimle zahîre hazînesine teslîm etmekle bâkīsi olan bin altı yüz yetmiş altı guruş otuz bir parayı dahi düyûn-ı sâiresini edâ ve bâkī kalır ise kendüye îsâl ve teslîm için bana def‘ ü teslîm ben dahi yedinden bi’l-vekâle ahz ü kabz edip min-ba‘d meblağ-ı mezkûrdan müvekkillerim mezbûrân Bektaş ile üveği oğlu karındaşım Hasan’ın vasîyy-i merkūm es-Seyyid Ali Ağa yedinde bir akçe ve bir habbe hakları ve alacakları kalmadı deyü ikrâr ve tasdîkleri İstanbul Mahkemesi’nden huzûr. Fî 27 min-Şa‘bâni’l-mu‘azzam sene 1242