İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 521 Hüküm no: 473 Orijinal metin no: [88b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kapatılan arpacı dükkânlarının vasî marifetiyle mallarının satılıp bedellerinin vekillerine teslim edildiği Mefkūd arpacıların Ma‘rûz Âsitâne-i aliyyede Kapan-ı dakīk hâric ve dâhilinde vâki‘ bi’l-cümle arpacı esnâfı bundan akdem bâ-emr-i âlî vilâyetlerine i‘zâm olunmuş ve esnâf-ı merkūmenin mahâll-i mezkûrda kâin dükkânları sedd ü bend ile mezbûrûnun gerek cânib-i mîrî ve gerek tüccâra olan deynleri ve ba‘zı kesân zimmetlerinde matlûbâtları alâ-hâlihî kalmış olduğundan bahisle merkūmûnun mâlları olup dekâkîn-i mezkûrîn derûnlarında mevcûd zahîreleri ma‘rifet-i şer‘ ve tüccâ[r] ma‘rifeti ve semen-i misilleriyle âhara füruht olunarak semenleri mîrî va kapan tüccârına olan deynlerine ba‘de’l-edâ fazla kalır ise esnâf-ı merkūme tarafına teslîm olunması bâbında ricâl-i Devlet-i Aliyye’den hâlâ zahîre nâzırı izzetlü Mehmed Ârif Efendi bendelerinin memhûr takrîri bâlâsına unvânı sahh-ı âlî ile müveşşah bu dâ‘îlerine hitâben sâdır olan fermân-ı âlîlerine imtisâlen dekâkîn-i mezkûrînin kuflü ma‘rifet-i şer‘le feth ve küşâd olundukdan sonra derûnlarında mevcûd olup kıbel-i şer‘-i şerîfden vasî nasb olunan kapan-ı merkūm tüccârından es-Seyyid Veliyüddin Yazıcı karındaşı demekle meşhûr es-Seyyid Ali b. es-Seyyid Mustafa ve tüccâr ma‘rifetleri ve semen-i misilleriyle âhara bey‘ olunan ma‘lûmü’l-keyl ve’l-fiyât erzen ve kokoroz ve şa‘îrin esmânından cem‘an elli sekiz bin beş yüz iki buçuk guruş on dokuz para vasîyy-i merkūm es-Seyyid Ali Ağa yedinde olup esnâf-ı merkūmûnun gerek düyûn-ı mezkûre ve gerek matlûbâtı husûsû ber-mûcib-i şerî‘at-i garrâ inde’t-terâfu‘ muvâcehe-i hasm-ı şer‘î lâzımeden olduğuna binâen kendi taraflarından vekîl-i müsbet-i şer‘îleri zuhûruna değin tevkīf olunmuşdu el-hâletü hâzihî esnâf-ı mezbûreden Sarı Ahmed b. İlyas nâm kimesne tarafından vekâlet-i âmme-i mutlaka ile vekîl olduğu kapan-ı mezkûr tüccârından el-Hâc Ahmed Ağa b. Hasan ve es-Seyyid el-Hâc Veliyüddin Ağa b. Ali nâm kimesne meclis-i şer‘-i enverde vasîyy-i mezbûr es-Seyyid Ali Ağa mahzarında kapan-ı merkūm tüccârı hazır oldukları hâlde müvekkilim merkūm Sarı Ahmed’in kapan-ı mezkûr hâricinde Dökmeciler zukāğı başında kâin sâkin olduğu iki bâb arpacı dükkânında mevcûd mâlı olup râyic-i vakt üzre beher keyli ellişer paraya olarak ber-mûcib-i emr-i âlî ma‘rifet-i şer‘le âhara bey‘ olunan altı yüz keyl şa‘îrin esmânı olan yedi yüz elli guruş ve beher keyli seksener paradan seksen keyl şa‘îrin esmânı olan yüz altmış guruş ve beher keyli yetmiş paradan üç yüz elli iki keyl şa‘îrin esmânı olan altı yüz on altı guruş ki cem‘an bin beş yüz yirmi altı guruş vasîyy-i merkūm es-Seyyid Ali Ağa’nın yedinde makbûzu olup müvekkilim mezbûrun dahi cânib-i mîrîye <> iki bin seksen dört guruş dokuz para deyni olduğundan meblağ-ı mezkûr bin beş yüz yirmi altı guruş henüz deyn-i mîrîsine dahi vâfî olmayıp bâkī zimmetinde cânib-i mîrîye beş yüz elli sekiz guruş dokuz para deyni kaldığından mâ‘adâ meblağ-ı merkūm bin beş yüz yirmi altı guruşu dahi deyn-i mîrî’çün fermân-ı âlî mûcibince bi’l-vekâle emrimle vasîyy-i merkūm es-Seyyid Ali Ağa zahîre hazînesine teslîm etmekle ol vechile meblağ-ı mezkûr bin beş yüz yirmi altı guruşdan müvekkilim merkūm Sarı Ahmed’in vasîyy-i mezbûr es-Seyyid Ali Ağa’nın yedinde bir akçe ve bir habbe hakkı ve alacağı kalmadı deyü ikrâr ve tasdîkleri İstanbul Mahkemesi’nden huzûr. Fî 27 min-Şa‘bân sene 1242