İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 522 Hüküm no: 474 Orijinal metin no: [88b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kapatılan arpacı dükkânlarının vasî marifetiyle mallarının satılıp bedellerinin vekillerine teslim edildiği Mefkūd arpacıların Ma‘rûz Âsitâne-i alliyede Kapan-ı dakīk hâric ve dâhilinde vâki‘ bi’l-cümle arpacı esnâfı bundan akdem bâ-emr-i âlî vilâyetlerine i‘zâm olunmuş ve esnâf-ı merkūmenin mahâll-i merkūmda kâin dükkânları sedd ü bend ile mezbûrûnun gerek cânib-i mîrî ve gerek tüccâra olan deynleri ve ba‘zı kesân zimmetlerinde matlûbâtları alâ-hâlihî kalmış olduğundan bahisle merkūmûnun mâlları olup dekâkîn-i mezkûrîn derûnlarında mevcûd zahîreleri ma‘rifet-i şer‘ ve tüccâr ma‘rifetiyle semen-i misilleriyle âhara füruht olunarak semenleri mîrî ve kapan tüccârına olan deynlerine ba‘de’l-edâ fazla kalır ise esnâf-ı merkūme tarafına teslîm olunması bâbında ricâl-i Devlet-i Aliyye’den hâlâ zahîre nâzırı izzetlü Mehmed Ârif Efendi bendelerinin memhûr takrîri bâlâsına unvânı sahh-ı âlî ile müveşşah bu dâ‘îlerine hitâben sâdır olan fermân-ı âlîlerine imtisâlen evvelen dekâkîn-i mezkûrînin kuflü ma‘rifet-i şer‘le feth ve küşâd olundukdan sonra derûnlarında mevcûd olup kıbel-i şer‘-i şerîfden vasî nasb olunan kapan-ı merkūm tüccârından es-Seyyid Veliyüddin Yazıcı karındaşı demekle meşhûr es-Seyyid Ali Ağa b. es-Seyyid Mustafa ve tüccâr ma‘rifetleri ve semen-i misilleriyle âhara bey‘ olunan ma‘lûmü’l-keyl ve’l-fiyât erzen ve kokoroz ve şa‘îrin esmânından cem‘an elli sekiz bin beş yüz iki buçuk guruş on dokuz para vasîyy-i mezbûr es-Seyyid Ali Ağa yedinde olup esnâf-ı merkūmenin gerek düyûn-ı mezkûre ve gerek matlûbâtı husûsu ber-mûcib-i şerî‘at-i garrâ inde’t-terâfu‘ muvâcehe-i hasm-ı şer‘î lâzımeden olduğuna binâen kendi taraflarından vekîl-i müsbet-i şer‘îleri zuhûruna değin tevkīf olunmuşdu el-hâletü hâzihî esnâf-ı mezbûreden Kulaksız oğlu Ahmed b. Memiş tarafından vekâlet-i âmme-i mutlaka ile vekîl olduğu kapan-ı merkūm tüccârından el-Hâc Ahmed Ağa b. Hasan ve bu def‘a me’zûnen Âsitâne-i aliyyeye gelen Âşık Mehmed oğlu Yusuf b. Mehmed şehâdetleriyle ve Balı Bey oğlu Himmet b. Mustafa tarafından kezâlik vekâlet-i âmme-i mutlaka ile vekîl olduğu Humbaracı Halil b. Ali ve mezbûr Âşık Mehmed oğlu Yusuf şehâdetleriyle mahzar-ı hasm-ı câhidde şer‘an sâbit ve sübût-ı vekâletlerine hükm-i şer‘î lâhık olan Arpacı el-Hâc İsmail Ağa b. Hasan meclis-i şer‘-i enverde vasîyy-i mezbûr es-Seyyid Ali Ağa mahzarında kapan-ı mezkûr tüccârı hazır oldukları hâlde müvekkillerim mezbûrândan merkūm Kulaksız oğlu Ahmed’in kapan-ı merkūm hâricinde Ekşioğlu zukāğı başında kâin sâkin olduğu bir bâb arpacı dükkânında mevcûd mâlı olup râyic-i vakt üzre beher keyli ellişer paraya olarak ma‘rifet-i şer‘le âhara bey‘ olunan dokuz yüz elli bir buçuk keyl şa‘îrin esmânı olan bin yüz seksen dokuz guruş on beş para ve beher keyli seksen beş paraya olarak kezâlik âhara bey‘ olunan elli keyl şa‘îrin esmânı olan yüz altı guruş on para ki cem‘an bin iki yüz doksan beş buçuk guruş beş para ve mezbûr Balı Bey oğlu Himmet’in kapan-ı mezkûr hâricinde çeşme karşısında Man? oğlu İsmail’in dükkânına muttasıl sâkin olduğu bir bâb arpacı dükkânında mevcûd mâlı olup kezâlik râyic-i vakt üzre beher keyli ellişer paraya olarak ma‘rifet-i şer‘le âhara bey‘ olunan altı yüz doksan bir keyl şa‘îrin esmânı olan sekiz yüz altmış üç buçuk guruş on para ki [89a] min-haysü’l-mecmû‘ iki bin yüz elli dokuz guruş on beş paranın iki yüz altmış guruşunu müvekkillerim mezbûrândan ancak merkūm Balı Bey oğlu Himmet’in cânib-i mîrîye ol mikdâr deyni’çün emrimle vasîyy-i merkūm es-Seyyid Ali Ağa zahîre hazînesine teslîm etmekle bâkīsi olan bin sekiz yüz doksan dokuz guruş on beş parayı bana def‘ ü teslîm ben dahi yedinden bi’l-vekâle ahz ü kabz ve müvekkillerim mezbûrândan merkūm Kulaksız oğlu Ahmed’in deyn-i mîrî olmadığına binâen mâlı olan meblağ-ı mezkûr bin iki yüz doksan beş buçuk guruş beş para ile merkūm Balı Bey oğlu Himmet’in deyn-i mîrîsinden bâkī kalan altı yüz üç buçuk guruş on paradan düyûn-ı sâirelerini edâ ve bâkī kalır ise kendülere îsâl ve teslîme ta‘ahhüd etmemle min-ba‘d meblağ-ı mecmû‘-ı mezkûr iki bin yüz elli dokuz guruş on beş paradan müvekkillerim mezbûrân Kulaksız oğlu Ahmed ve Balı Bey oğlu Himmet’in vasîyy-i mezbûr es-Seyyid Ali Ağa yedinde bir akçe ve bir habbe hakları ve alacakları kalmadı deyü ikrâr ve tasdîkleri İstanbul Mahkemesi’nden huzûr. Fî 27 min-Şa‘bân sene 1242