İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 524 Hüküm no: 475 Orijinal metin no: [89a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kapatılan arpacı dükkânlarının vasî marifetiyle mallarının satılıp bedellerinin vekillerine teslim edildiği Mefkūd arpacıların Ma‘rûz Âsitâne-i aliyyede Kapan-ı dakīk hâric ve dâhilinde vâki‘ bi’l-cümle arpacı esnâfı bundan akdem bâ-emr-i âlî vilâyetlerine i‘zâm olunmuş ve esnâf-ı merkūmenin mahâll-i mezkûrda kâin dükkânları sedd ü bend ile mezbûrûnun gerek cânib-i mîrî ve gerek tüccâra olan deynleri ve ba‘zı kesân zimmetlerinde matlûbâtları alâ-hâlihî kalmış olduğundan bahisle merkūmûnun mâlları olup dekâkîn-i mezkûrîn derûnlarında mevcûd zahîreleri ma‘rifet-i şer‘ ve tüccâr ma‘rifeti ve semen-i misilleriyle âhara füruht olunarak semenleri mîrî ve kapan tüccârına olan deynlerine ba‘de’l-edâ ve fazla kalır ise esnâf-ı merkūme tarafına teslîm olunması bâbında ricâl-i Devlet-i Aliyye’den hâlâ zahîre nâzırı izzetlü Mehmed Ârif Efendi bendelerinin memhûr takrîri bâlâsına unvânı sahh-ı âlî ile müveşşah bu dâ‘îlerine hitâben sâdır olan fermân-ı âlîlerine imtisâlen evvelen dekâkîn-i mezkûrînin kuflü ma‘rifet-i şer‘le feth ve küşâd olundukdan sonra derûnlarında mevcûde olup kıbel-i şer‘-i şerîfden vasî nasb olunan kapan-ı merkūm tüccârından es-Seyyid Veliyüddin Yazıcı karındaşı demekle meşhûr es-Seyyid Ali Ağa b. es-Seyyid Mustafa ve tüccâr ma‘rifetleri ve semen-i misilleriyle âhara bey‘ olunan ma‘lûmü’l-keyl ve’l-fiyât erzen ve kokoroz ve şa‘îrin esmânından cem‘an elli sekiz bin beş yüz iki buçuk guruş on dokuz oara vasîyy-i mezbûr es-Seyyid Ali Ağa yedinde olup esnâf-ı merkūmûnun gerek düyûn-ı mezkûre ve gerek matlûbâtı husûsu ber-mûcib-i şerî‘at-i garrâ inde’t-terâfu‘ muvâcehe-i hasm-ı şer‘î lâzımeden olduğuna binâen kendi taraflarından vekîl-i müsbet-i şer‘îleri zuhûruna değin tevkīf olunmuşdu el-hâletü hâzihî esnâf-ı mezbûreden Emir? Mehmed b. Mehmed ve Seyyid Himmet b. Mehmed nâm kimesneler <<şehâdetleriyle>> taraflarından vekâlet-i âmme-i mutlaka ile vekîlleri olduğu kapan-ı mezkûr tüccârından el-Hâc Ahmed Ağa b. Hasan ve Humbaracı Halil b. Ali nâm kimesneler şehâdetleriyle mahzar-ı hasm-ı câhidde şer‘an sâbit ve sübût-ı vekâletine hükm-i şer‘î lâhık olan Kasımpaşa’da Arpacı Hızır b. Osman nâm kimesne meclis-i şer‘-i enverde vasîyy-i mezbûr es-Seyyid Ali Ağa mahzarında kapan-ı merkūm tüccârı hazır oldukları hâlde müvekkillerim mezbûrândan merkūm Emir Mehmed’in kapan-ı mezkûr hâricinde Otlukkapısı nâm mahâlde Memiş dükkânı ittisâlinde kâin sâkin olduğu bir bâb arpacı dükkânında mevcûd mâlı olup râyic-i vakt üzre beher keyli ellişer paraya olarak ber-mûcib-i emr-i âlî ma‘rifet-i şer‘le âhara bey‘ olunan yedi yüz doksan sekiz keyl şa‘îrin esmânı olan dokuz yüz doksan yedi buçuk guruş ve merkūm Seyyid Himmet’in dahi dükkân-ı mezkûr ittisâlinde kâin kezâlik sâkin olduğu bir bâb arpacı dükkânında mevcûd mâlı olup râyic-i vakt üzre beher keyli ellişer paradan bin elli sekiz keyl şa‘îrin esmânı olan bin üç yüz yirmi iki buçuk guruş ve beher keyli yetmiş sekizer paradan sekiz yüz keyl şa‘îrin esmânı olan bin beş yüz altmış guruş ve beher keyli altmış beşer paradan yüz yetmiş altı keyl şa‘îrin esmânı olan iki yüz <<üç>> seksen altı guruş ve beher keyli altmışar paraya olarak yüz yirmi keyl erzenin esmânı olan yüz seksen guruş ve beher keyli elli üçer paraya olarak iki yüz üç keyl erzenin esmânı olan iki yüz altmış sekiz buçuk guruş on dokuz para ki min-haysü’l-mecmû‘ dört bin altı yüz on dört buçuk guruş on dokuz paranın sekiz yüz yirmi sekiz guruşunu müvekkilerim mezbûrândan merkūm Emir Mehmed’in cânib-i mîrîye ol mikdâr deyni’çün fermân-ı âlî mûcibince bi’l-vekâle emrimle vasîyy-i mezbûr es-Seyyid Ali Ağa zahîre hazînesine teslîm etmekle bâkīsi olan üç bin yedi yüz seksen altı buçuk guruş on dokuz parayı bana def‘ ü teslîm ben dahi yedinden bi’l-vekâle ahz ü kabz ve müvekkillerim mezbûrândan merkūm Emir Mehmed’in emvâl-i mebî‘ası esmânı olan meblağ-ı mezkûr dokuz yüz doksan yedi buçuk guruşdan deyn-i mîrîsinden bâkī kalan yüz altmış dokuz buçuk guruş ile mezbûr Seyyid Himmet’in dahi sâkin olduğu dükkân-ı mezkûr derûnunda mevcûd emvâl-i mebî‘asının esmânı olan cem‘an üç bin altı yüz on yedi guruş on dokuz paradan düyûn-ı sâirelerini edâ [ve] bâkī kalır ise kendülere îsâl ve teslîme ta‘ahhüd etmemle min-ba‘d meblağ-ı mecmû‘-ı mezkûr dört bin altı yüz on dört buçuk guruş on dokuz paradan müvekkillân-ı mezbûrân Emir Mehmed ve Seyyid Himmet’in vasîyy-i mezbûr es-Seyyid Ali Ağa yedinde bir akçe ve bir habbe hakları ve alacakları kalmadı deyü ikrâr ve tasdîkleri İstanbul Mahkemesi’nden huzûr. Fî 27 min-Ş sene 1242