İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 525 Hüküm no: 476 Orijinal metin no: [89a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Salamon v. Rafayel’in,şirâen malik olduğu parçacı gediği hisselerini, kalemde kaydı olmadığından sattığı İmâm Ali Hânı tahtında parçacı gediği mübâya‘ası Ma‘rûz Parçacı esnâfından sahib-i arzuhâl Salamon v. Rafayel nâm Yahûdî evvelen şifâhen sâdır [olan] fermân-ı âlî-şâna imtisâlen Çarşamba günü Arz Odası’nda huzûr-ı lâmi‘u’n-nûr-ı vekâlet-penâhîlerinde ve ba‘dehû bi’t-terâzî du‘âhânemizde ma‘kūd meclis-i şer‘-i münîrde nezâret-i dâ‘îlerinde olan evkāfdan merhûm Nâzikî Hatun Vakfı’ndan İstanbul’da Mercan sûkunda İmâm Ali Hânı tahtında vâki‘ şehriye yirmi dört akçe icâreli bir bâb odanın beş hisse i‘tibârıyla el-yevm üç hissesine bi’l-icâreteyn mutasarrıfe olan Ümmü Gülsüm bt. Ahmed nâm hatun tarafından oğlu Mustafa Tahir Efendi b. el-Hâc Mustafa’nın vekîl olduğu ve iki hissesine babaları el-Hâc Halil ve vâlideleri Şerife Fâtıma intikāllerinden bi’l-iştirâk-i icâreteyn ile mutasarrıflar olan el-Hâc Mehmed Emin Ağa kendi nefsinden asâleten ve kız karındaşları Şerife Âişe ve Şerife Habibe Hatunlar taraflarından vekîlleri olduğu zevât-ı mezbûrâtı ârifân Attar el-Hâc Hüseyin Ağa b. Mehmed ve Attar Emin Ağa b. Abdullah nâm kimesneler şehâdetleriyle sâbit olmağla vekâleten muvâcehelerinde oda-i mezkûre derûnunda mevcûde parçacı gediği ta‘bîr olunur bir sandık ve bir mikrâs ve bir endâze ve bir akçe tahtası ve sâir âlât-ı lâzıme-i ma‘lûme hâmiş-i arzuhâlde mastûr hüccet kaydı mantûkunca şirâen <> mâlım iken oda-i mezkûre mutasarrıfları merkūmûn beni ihrâc dâ‘iyesinde olmalarıyla [89b] kemâ-kân iskânıma mümâna‘at etmemeleri’çün tenbîh olunmasını iddi‘â etmişdim lâkin gedik-i mezkûr aklâm-ı hümâyûnun birinde mukayyed ve mu‘teber gediklerden olmadığından iddi‘âm şer‘an ve kānûnen iltifâta şâyân olmadığından mâ‘adâ mâlik olduğum âlât-ı mezkûreyi dahi kezâlik beş sehm i‘tibârıyla üç sehmini mezbûre Ümmü Gülsüm Hatun’a ve iki sehmini dahi ale’l-iştirâki’s-seviy mezbûrûn el-Hâc Emin Ağa ve Şerife Âişe Hatun ve Şerife Habibe Hatun’dan her birine bey‘-ı bâtt-ı sahîh-i şer‘î ve safka-i vâhide ile sekiz yüz guruş semen-i makbûza bey‘ ve temlîk ve teslîm onlar dahi iştirâ ve tesellüm ve her birimiz tağrîr ve gabnine müte‘allika da‘vâdan birbirimizin zimmetini kabûlü hâvî ibrâ ve ıskāt eyledik fîmâ-ba‘d oda-i mezkûrede bir gûne medhalim ve âlât-ı merkūmede dahi alâkam kalmamışdır deyü ikrâr ve tesâdukları İstanbul Mahkemesi’nden huzûr. Fî 21 min-Z sene 1242