İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 526 Hüküm no: 477 Orijinal metin no: [89b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bursa’dan İstanbul’a gelip imal ettikleri sepetleri satan sepetçilerin, sepetçi esnafı mütevellisine teberruan on guruş verecekleri Sepetçi esnâfına müte‘allik Ma‘rûz Beher sene mahrûse-i Bursa’dan Der-aliyye’ye gelip şevâlliye? ve işportaval sepeti ve bu makūle nesne i‘mâliyle bir müddet ikāmet ve sâye-i inâyet-vâye-i şâhânede ta‘ayyüş ve ticâret ve ba‘dehû memleketlerine avdet mu‘tâdları olan Seyyid İbrahim b. Mehmed ve Mustafa b. Yahya ve İsmail b. Mustafa ve Mehmed b. Süleyman ve es-Seyyid Zeynelabidin b. Salih ve Hasan b. Yakub nâm kimesneler meclis-i şer‘-i münîrde Âsitâne-i aliyyede vâki‘ sepetçi esnâfı kethudâsı Mustafa Ağa b. Mehmed ve yiğitbaşı Veyis Ağa b. Ali ve müsinn ü ihtiyârlarından Mustafa Usta <> ve Hüseyin Usta ve Hasan Usta ve Ömer Usta ve Ali Usta ve sâirleri muvâcehelerinde esnâf-ı mezbûre mütevellîsi İsmail Ağa b. Ali hazır olduğu hâlde biz beher sene bâlâda tafsîl olunduğu üzre Der-aliyye’ye gelip i‘mâl eylediğimiz san‘at esnâf-ı merkūmenin san‘atları nev‘inden olmak hasebiyle esnâf-ı merkūmeye mülhak olmamızla bir esnâfa mülhak olanlar ol esnâfın umûr-ı mühimme ve angaryalarına dahi iltihâk ve i‘âne usûl-i kadîm ve muktezâ-yı nizâm-ı belde ise de bizim bir mahalle vergimiz ve bir gûnede angaryada hizmetimiz olmadığından bu âna kadar geldikçe esnâf-ı merkūmeye nakden birer mikdâr i‘âne edegelmişdik lâkin esnâf-ı merkūmenin bize küllî meded ve gayretleri olduğuna nazaran bizim dahi lâyıkıyla i‘ânemiz lâzım geldiğine binâen beher sene geldikçe reisimizden bir nesne mutâlebe olunmamak şartıyla beher neferimiz esnâf-ı merkūme mütevellîsi hâzır-ı mezbûra rızâmızla teberru‘an onar guruş verip ol dahi ahz ve cem‘ ve Âsitâne-i aliyyede Saraçhânebaşı’nda vâki‘ sepetçi esnâfının sâkin oldukları Küçük Saraçhâne derûnunda kâin mescid-i şerîfin revgan-ı zeyt ve şem‘-i asel ve sâir levâzımına emr ve tevkîlimizle harc ü sarfa ta‘ahhüd ve bu vechile beynimizde takviye-i şîrâze-i ittihâd kasdıyla nizâma rabteyledik deyü tarafeynin takrîr ve tesâdukları bi’l-iltimâs İstanbul Mahkemesi’nden tescîl olunduğu huzûr. Fî 18 Z sene [1]242