İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 527 Hüküm no: 478 Orijinal metin no: [89b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bahçıvan taifesinin ödeyecekleri vergi ve sâir masraflarına dair nizamları Bağçevânların tekâlîf nizâmlarına dâir Ma‘rûz Âsitâne-i aliyyede vâki‘ bağçevân tâifesinin Yenibağçe kolu yiğitbaşısı Kiryako v. Pavli ve kol ı mezkûr mülhakātından Topkapı sınırı yiğitbaşısı Çelo v. Hristo ve Sulukule sınurı yiğitbaşısı Naço v. Karko ve bağçevânlarından Petro v. Niko ve Manol v. Niço ve Yani v. Dimo ve Kosta v. Nikola ve Çelo v. İstefan ve İstefani v. Metro ve Metako v. İstefan nâm zimmîler ve sâirleri evvelâ Çarşamba günü Arz Odası’nda huzûr-ı lâmi‘u’n-nûr-ı vekâlet-penâhîlerinde ve ba‘dehû bi’t-terâzî dâ‘îhânelerinde ma‘kūd meclis-i şer‘-i münîrde yine kol ı mezkûr mülhakātından Balat sınırı yiğitbaşısı Bogos v. Akna zimmî ve bağçevanlarından es-Seyyid Mehmed Şerif Ağa b. Ali ile Sivetko v. Metro ve Hristo v. Viço ve Andriya v. Paryo ve Manol v. Lazo ve Yuvan v. Tutya ve Yorgi v. Tarandafil nâm zimmîler ve sâirleri muvâcehelerinde bağçevânlar kethudâsı Süleyman Ağa ve Eyüb kethudâsı Mustafa Ağa ve Kasımpaşa kethudâsı İsmail Ağa ve Üsküdar kethudâsı Musa Ağa ve sâir bi’l-cümle bağçevân tâifesi hazır oldukları hâlde Âsitâne-i aliyye ve Eyüb ve Galata ve Üsküdar ve tevâbi‘lerinde bulunan bağçevân tâifesi üzerlerine nâzile olan tekâlîf-i bedel-i kol i‘tibârıyla tevzî‘ ve taksîm olunarak derûn-ı İstanbul üç kol olup biri Yedikule ve biri Langa ve biri Yenibağçe kolları ve Eyüb kazâsı Kâğıdhâne’den Büyükçekmece’ye varınca iki kol ve Galata kazâsı Kasımpaşa kolu ta‘bîriyle Cendere Boğazı’ndan Rumeli Kavağı’na varınca bir kol ve Üsküdar kazâsı dahi Kādı karyesinden Anadolu Kavağı’na varınca bir kol i‘tibâr olunmağla yalnız Üsküdar kazâsının tekâlîf-i mu‘tâdesi kazâ-i mezbûr bağçevânları başkaca edâ etmek ve İstanbul ve Eyüb ve Kasımpaşa bağçevânlarının dahi Tersâne-i âmirede istihdâm için beher yevm veregeldikleri eyyâm-ı sayfda iki yüz nefer ve eyyâm-ı şitâda üç yüz nefer ameleden şitâ tertîbi olan yevmiye üç yüz neferden İstanbul hissesine müretteb yüz otuz beş neferin elli dört neferini Yedikule kolu ve yirmi yedi neferini Langa kolu ve elli dört neferini Yenibağçe kolu veregelmeleriyle sâir kollarda olduğu vechile Yenibağçe kolunun dahi kendi sınırında olan bağçelerinden mâ‘adâ Sulukule ve Topkapı ve Çukur ve Balat sınırları<<ında>> ıtlâkıyla dört mahâl sınırları olmağla sâlifü’z-zikr şitâ tertîbi hissesi olan elli dört neferin on iki neferini Balat sınırı ve altı neferini Çukur sınırı ve on ikişer neferden otuz altı neferini dahi zikrolunan nefs-i Yenibağçe ve Sulukule ve Topkapı sınırları bağçevânları te’diye ve îfâ eylemek ve eyyâm-ı sayfda verilen iki yüz nefer dahi bu hesâba kıyâsen kol kol beynimizde iktisâm etmek ve rûz-ı Kasım’dan rûz-ı Hızır’a kadar altı ayda Enderûn-ı Hümâyûn ta‘yînâtı ve mu‘ayyenât-ı sâir[e] için sâlifü’z-zikr Yenibağçe kolundan verilegelen yevmiye yüz yirmi vakıyye isfinâh için dahi zikrolunan Balat sınırı bağçevânları ber-vech-i maktû‘ yirmi yedi guruş vermek nizâm-ı kadîmimizden iken bu def‘a Balat sınırı bağçevânları merkūmûn bağçelerinin harâbiyetinden bahisle yevmiye on iki neferi vermekde izhâr-ı acz ve öteden beri beynimizde cereyân edegeldiği vechile ma‘rifet-i şer‘ ve mi‘mâr ağa ma‘rifetiyle keşfolunarak herkesin ve hâl-i tahammülüne göre taksîm olunmasını istid‘â ve biz dahi ol mikdâr [90a] isfinâh maktû‘u dûn olduğu beyânıyla mevcûd olan bağçelere ale’s-seviye tarh ve tevzî‘ kılınmasını iddi‘â ve ol vechile beynimizde münâza‘ât-ı kesîr[e] vukū‘a gelmişdi el-hâletü hâzihî beynimiz ıslâh ve te’lîf olunup mârrü’z-zikr Balat sınırı bağçevânları merkūmûn ber-vech-i maktû‘ veregeldikleri yirmi guruş isfinâh bedeliyesi üzerine bi’r-rızâ yetmiş üç guruş dahi zamla senevî maktû‘an bize yüz guruş vermeğe müte‘ahhid olduklarında biz dahi ber-vech-i bâlâ Tersâne’de istihdâm için şitâ tertîbinden onların verdikleri yevmiye on iki neferin üç neferini rızâmızla tenzîl ve Çukur sınırı bağçeleri gāyet harâb ve bî-mahsûl olduğundan bir nesne zam olunmayarak mâ‘adâ nefs-i Yenibağçe ve Topkapı ve Sulukule sınırları bağçelerine birer neferden zam ve tahmîl etmemizle eyyâm-ı şitâda beher yevm fîmâ-ba‘d zikrolunan Balat sınırı ancak dokuz nefer ve Çukur sınırı kemâ-kân altı nefer ve nefs-i Yenibağçe ve Topkapı ve Sulukule sınırları dahi ma‘a-zamm-ı cedîd on üçer nefer amele vermek ve eyyâm-ı sayfda dahi bu hesâb üzre taksîm ve ber-mu‘tâd-ı kadîm veregeldiğimiz sâir tekâlîf ve mesârifimiz dahi bu def‘a ber-vech-i muharrer karâr verilen sûretle beynimizde tarh ve tevzî‘ olunmak üzre müte‘ahhid ve cümlemiz râzı olarak kat‘-ı nizâ‘ eyledik deyü takrîr ve tesâdukları huzûr. Fî 27 B sene [1]242