İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 133 Hüküm no: 7 Orijinal metin no: [16b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Parayı değerinden fazlaya alıp verenlerin cezalandırılacağı Bâ-sah. İstanbul kādısı fazîletlü efendi; Cümleye ma‘lûm olduğu vechile fiyat-ı nukūd maddesinde adem-i mübâlât cemî‘-i eşyâ ve es‘âra dokunur madde olunduğundan mukaddemâ ittifâk-ı ârâ ile her bir cins akçenin fiyatı takdîr ve ziyâdeye alınıp verilmemesi lâzım gelenlere tenbîh olunarak neşr ve i‘lân kılınmışiken yine ba‘zı tammâ‘ ve muhtekir tâifesi mücerred habâsetinden nâşî envâ‘-ı nukūdu ziyâdeye vermek için taşralara götürüp bu tarafda dahi baş ile sarraflardan altın mübâya‘a etmekde olduğundan ve taşralarda dahi refte refte nukūdun fiyatı artmakda idiğinden bu keyfiyet taşradan Dersa‘âdet’e akçe gelmeyerek bir tarafdan kat‘ olunan nukūd dahi taşra giderek Dersa‘âdet’de nukūdun fıkdânını mûcib olduğuna binâen ba‘d ez-în her kim fiyat-ı mukarrere-i ma‘lûmesinden ziyâdeye gerek altın ve gerek beyaz akçe alır ise ve bu töhmetle alan ve veren ahz olunur ise sarraf vesâir her kim olur ise olsun Darbhâne-i âmirede tedîb olunmayıp Bâb-ı âlî’de tomruğa vaz‘ ve siyâset olunması husûsuna irâde-i mehâbet-ifâde-i şâhâne ta‘alluk ederek bu husûs Memâlik-i mahrûseye dahi evâmir-i aliyye neşriyle tenbîh olunmuş olmağla siz dahi eimme-i mahallât vesâir iktizâ edenleri celb ve bu tenbîh tenbîh-i âdi olmayıp irâde-i mehâbet-ifâde-i şâhâne muktezâsı olduğunu hafî ve celî bilinmez kıyâfetle adamlar ta‘yîn olunarak taharrî olunacağını ve ele geçen her kim olur ise olsun siyâset kılınacağını beyân ederek bundan sonra zinhâr ve zinhâr revâcından ziyâdeye nukūd alıp vermeğe cesâret etmemelerini etrâfıyla iktizâsına göre beyân ve tefhîme dikkat eyleyesin deyü. Fî 21 Z sene [1]237