İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 133 Hüküm no: 8 Orijinal metin no: [16b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Darphâne tarafından dirhemi on altı guruşa alınacağı ilan edilen altının on dört buçuk guruş olarak düzeltildiği Bâ-sah. İstanbul kādısı fazîletlü efendi; Ehl-i İslâma isti‘mâli şer‘an memnû‘ olan evânî-i simîniye ve zehebiyenin verilen fetvâ-yı şerîf mûcebince cânib-i Darbhâne-i âmireye teslîmiyle simin beher dirhemine otuz ikişer paradan ve altının beher dirhemine on altışar guruşdan îcâb eden bahâsını almaları geçen gün neşrolunan buyruldularda beyân ve tasrîh kılınmış ise de altının beher dirhemine on altışar guruş fî-mâddesinde sehv vâki‘ olup el-hâletü hâzihî altının beher dirhemi on dörder buçuk guruşa mübâya‘a olunmakda olduğu defterlerden zâhir ve ayân ve bu cihetle herkesin Darbhâne-i âmireye götürecekleri altının dirhemine on dörder buçuk guruşdan akçesi verilmek lâzım geleceği nümâyân olarak keyfiyet iktizâ edenlere tenbîh olunmuş olmağla mukaddem neşrolunan buyruldularda sehven yazılan on altı guruşun kaydı mahallini on dörder buçuk guruşa deyü tashîh ve bu keyfiyet lâzım gelenlere tefhîm eyleyesin deyü. Fî 29 Z sene [1]237