İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 134 Hüküm no: 9 Orijinal metin no: [16b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. 1238 senesi İstanbul avarız bedellerinin tahsili emri Bâ-sah. Avârız fermânı. Akzâ kuzâti’l-Müslimîn evlâ vülâti’l-muvahhidîn ma‘deni’l-fezâili ve’l-yakīn râfi‘u a‘lâmi’ş-şerî‘ati ve’d-dîn vâris-i ulûmi’l-enbiyâi ve’l-mürselîn el-muhtassu bi-mezîd-i inâyeti’l-Meliki’l-Mu‘în İstanbul kādısı zîdet fezâiluhû tevkī‘-i refî‘-i hümâyûn vâsıl olıcak ma‘lûm ola ki Hazîne-i âmirem defterleri mûcebince Tersâne-i âmirem ocaklıklarından İstanbul kazâsının iki bin altı yüz doksan beş buçuk ve bir sülüs avârız hânesi olup bin iki yüz otuz sekiz senesine mahsûb olmak üzere cem‘ ve tahsîl lâzım gelmeğin ( ) deruhde olunup yedine mühürlü ve nişanlu Mevkūfât defteri sûreti mûcebince cem‘ ve tahsîl ettirilmek fermânım olmuşdur. Buyurdum ki hükm-i şerîfimle mübâşir vardıkda bu bâbda sâdır olan emrim üzere amel edip dahi sene-i mezbûra mahsûben kazâ-i mezbûrun ol mikdâr avârız hânesi olup Tersâne-i âmirem ocaklığı olmağla beher hânesinden dörder yüz yirmi dokuzar akçe kürekci bedellerin irsâl olunan mühürlü ve nişanlı Mevkūfât defteri sûreti mûcebince vakt ü zamânıyla yerli yerinden cem‘ ve tahsîl ve dâhil-i Tersâne-i âmirem ettirilip hilâf-ı emr ve vakt kimesneye ta‘allül ve muhâlefet ettirmeyesin ve bundan mâ‘adâ mübâşir-i merkūmun cihet-i ma‘âşiçin her bir avârız hânesinden otuzar akçe vech-i ma‘âş ve on beşer akçe harc-ı Tersâne-i âmire için aldırılıp ve avârız için alınan akçenin her yüz on akçesinden [17a] bir esedî guruş tahsîl olunup ve hîn-i tahsîlde ve mîrî’çün alınan akçeyi Hazîne-i âmireme alındığı vech üzere aldırdıp bundan ziyâde ve noksan alınmaya ve aldırmayasın. Kesr-i defterden ve noksan hâneden ve fermânımdan ziyâde mutâlebesiyle zulüm ve te‘addîden be-gāyet hazer ve mücânebet eyleyesin. Şöyle bilesin alâmet-i şerîfe i‘timâd kılasın. Tahrîren el-yevmü’s-sânî aşer şehr-i Zilka‘de sene seb‘a ve selâsin ve mi’eteyn ve elf. Be-makām-ı Kostantıniyye el-mahrûse.