İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 135 Hüküm no: 10 Orijinal metin no: [17a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kullanılmakta olan tüm yerli ve yabancı sikke ve altın paraların değerinde alınıp verilmesi Bâ-sah. İstanbul kādısı fazîletlü efendi; Darbhâne-i âmiremde kat‘ ve darb olunan nukūd-ı hasene-i şâhâne ve düvel-i ecnebiyye sikkelerinden fakat revâcdan memnû‘ olan süfûrîn ve dublin cinslerinden mâ‘adâ kâffe-i meskûkâtın mukaddemâ ittifâk-ı ârâ ile verilen nizâmı üzere te‘âmül olunup şöyle ki İstanbul altını sekiz guruş ve Mısır altını yedi guruş ve Fındık altını on bir guruşa ve Cezâyir ve Tunus ve Trablusgarb altınları on iki guruş ve Rûmî altını yirmi beş guruş ve Rûmî nısfiyyesi on iki buçuk guruş ve rub‘iyyesi altı guruş on paraya ve Fındık rub‘iyyesi üç guruş İstanbul rub‘iyyesi iki buçuk guruş ve Yaldız altını on beş guruş on paraya ve Macar altını on beş guruş ve Macar cinsinden Kıramise altını on dört buçuk guruş on paraya ve Cihâdiye beş guruş ve atîk ve cedîd yüzlük iki buçuk guruş ve ikilik iki guruş ve dâne guruş kırk paraya ve rub‘ on paraya ve avârız cinsinden mâ‘adâ üç nev‘ Riyâl altı buçuk guruş ve avârız altı guruş olmak ve bi’l-cümle ahz u i‘tâ ve bey‘ ü şirâda bu mikdâr cârî olup bir akçe ziyâdeye alınıp verilmemek husûsları şimdiye dek bi’d-defa‘ât buyruldular ısdârıyla cümleye tenbîh ve i‘lân ve işâ‘at olunmuş ve bu def‘a teyemmünen ve tefe’ülen mübârek nâm-ı sâmi-yi hazret-i hilâfet-penâhîye izâfetle Adlî tesmiye olunan altının tammı on iki guruş nısfı altı guruş cârî olup cins-i mezkûrun rub‘iyyesi yine yüz paraya olmak üzere kalmışiken erbâb-ı ihtikâr ve fesâd derhâl ihtilâl-i fiyat-ı nukūda ictisâr ile cins-i mezkûr rub‘iyyesini üç guruşa kadar alıp vermeğe mübâşeret eyledikleri istimâ‘ olundukda der-akab lâzım gelenlere tenbîh ile men‘ ü def‘ olunmuş ise de muhâfaza-i revâc-ı nukūd maddesi kâffe-i mu‘âmelâtın esâs ve nizâm-ı mülk ve milletin mebnâsı olduğundan ve şimdiye kadar erbâb-ı ihtikâr ecnâs-ı nukūdu birer ikişer para artırarak refte refte terakkī-yi fiyat ile bu dereceye îsâline bâ‘is oldukları bi’t-tecrübe ma‘lûm ve âşikâr idiğinden ba‘d ez-în minvâl-i meşrûh üzere olan râdde-i karâr ve nizâmını bir vechile tecâvüz etmemesine bi’l-ittifâk ikdâm-ı tâm olunarak bundan böyle bir akçe ziyâdeye her kim alır verir ise mücâzât-ı lâyıkası icrâsında dakīka fevt olunmayıp ya‘ni hıfzan li’n-nizâm o makūle habâsetkârlar siyâsetle tertîb-i cezâ kılınacağına mebnî bildim bilmedim demeğe mahal kalmamak için sagīr ve kebîr cümleye i‘lân ve tefhîm olunmak lâzım gelmeğin ona göre keyfiyeti herkesin gûş-ı hûşuna tefhîm ve telkīne mübâderet ve mukaddem ve muahhar emr ve tenbîh olunduğu üzere memnû‘ olan süfûrîn ve dublin cinslerinden mâ‘adâ gerek sikke-i hasene-i şâhâne ve gerek düvel-i ecnebiye sikkeleriyle meskûk olan ecnâs-ı altın ve nukūdun bir para ziyâdeye alınıp verilmesi bir vechile vukū‘ gelmemesine ikdâm ve dikkat eyleyesin deyü. Fî 10 S sene [1]238.