İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 136 Hüküm no: 12 Orijinal metin no: [17b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrail, Kalas, Ruscuk ve Silistre taraflarına gidecek olan tüccarlara mürur tezkiresi verilmesi tezkiresi olmayanların özellikle Eflak ve Bogdan’a girişlerine izin verilmemesi Bâ-sah. İstanbul kādısı fazîletlü efendi; Eflak ve Bogdan re‘âyâsının Rumeli cânibine tezkire ve zâbitsiz ayak basdırılmamasına dâir fermân-ı âlî. Eflak ve Bogdan memleketlerinin i‘âde-i âsâyiş ve emniyetleri zımnında Memleketeyn-i merkūmeteynde olan Rum ve Bulgar ve Arnavud vesâir ecnâs-ı muhtelife makūlesi Rumeli’ye def‘ ve imrâr kılınarak bu misilliler hiçbir vakitde ol taraflara ayak basdırılmamak ve içlerinden ba‘zısı serhâdât-ı hâkānîyeye gelip maslahat-ı mahsûsa beyânıyla Memleketeyn’e mürûr etmek istid‘âsında olurlar ise o makūleler tahkīk ve tedkīk ile salıverilmesinde bir gûne beis görünmediği sûretde keyfiyetiyle şeklini mübeyyin yedine tezkire verilerek lâzım gelen zâbitân ma‘rifetleriyle gönderilip maslahatı bittiği gibi i‘âde olunmak üzere Tuna sevâhiline tenbîhât-ı seniyye neşriyle zikrolunan memleketlerin nizâm ve intizâm-ı hâllerine i‘tinâ olunmakda olduğu zâhir ve fi’l-asl dahi Eflak ve Bogdan memleketlerine fermânlı tüccâr ile tezkireli şerîk ve yazıcılarından mâ‘adâ eşhâs makūlesinin mürûrları memnû‘ olarak el-hâletü hâzihî Dersa‘âdet’den taşra gideceklere tezkire i‘tâsı hakkında mer‘iyyü’l-icrâ olan nizâm mûcebince bu maddeye dahi dikkat îcâb-ı maslahatdan idiği bedîhî ve bâhir olmağın imdi fîmâ ba‘d Dersa‘âdet’den li-ecli’t-ticâre İbrail ve Kalas ve Ruscuk ve Silistre vesâir ol taraflara gidecek olan Kapan-ı dakīk tâcirleri ve şerîk ve yazıcılarına Kapan nâibi efendi cânibinden ve yağ ve bal kapanları takımına dahi kapanları nâzırları taraflarından ihbârlar ile sahîh ticâret zımnında azîmet edecekleri ber-vech-i terfîk [ve] tahkīk olunarak esâmî ve eşkâli ve ticâretle gittiğine dâir ahvâli derc ve tasrîh ile yedlerine mürûr tezkireleri verilip ol vechile hâl ve keyfiyetleri tahkīk olunmayanlar bu mahallere ve husûsuyla Memleketeyn’e azîmet ettirilmeyerek icrâ-yı irâde-i seniyye ile vikāye-i nizâma ale’d-devâm dikkat ve ihtimâm eyleyesin deyü. Fî 27 Ra sene [12]38.