İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 137 Hüküm no: 13 Orijinal metin no: [17b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul İhtisab mukataasının bir yıllığına mültezim Mehmed Hamdullah’a verildiği İhtisâb. Akzâ kuzâti’l-Müslimîn evlâ vülâti’l-muvahhidîn ma‘deni’l-fazli ve’l-yakīn râfi‘u a‘lâmi’ş-şerî‘ati ve’d-dîn vâris-i ulûmi’l-enbiyâi ve’l-mürselîn el-muhtassu bi-mezîd-i inâyeti’l-Meliki’l-Mu‘în Mevlânâ İstanbul kādısı zîdet fezâiluhû tevkī‘-i refî‘-i hümâyûn vâsıl olıcak ma‘lûm ola ki bâ-hatt-ı hümâyûn-ı şevket-makrûnum Darbhâne-i âmirem tarafından zabt ve idâre olunan mukāta‘ât-ı mîrîyemden İhtisâb-ı İstanbul ve tevâbi‘i mukāta‘asının sülüs hissesi Darbhâne-i âmiremde ve diğer sülüsân hissesi müşterekleri uhdesinde olup ötedenberü yed-i vâhidden zabt ve idâre oluna gelmekden nâşî mukāta‘a-i mezkûreyi işbu bin iki yüz otuz sekiz senesi Martı ibtidâsından sene-i merkūme Şubat’ı gāyetine değin bir sene-i kâmile yed-i vâhidden zabt ve idâre eylemek üzere deruhde ve iltizâmına tâlib ve râgıb ola[n] mültezimînden kıdvetü’l-emâcid ve’l-a‘yân Mîr Mehmed Hamdullah zîde mecdühûya bi’l-irâdeti’s-seniyyem sâbıkı üzere ma‘a mâl ve <> kalemiye ve harc-ı aklâm ve fâiz-i mukāta‘a-i mezkûre cem‘an otuz sekiz bin guruş bedel-i iltizâm ile deruhde ve ilzâm olunup mûmâ-ileyh dahi iltizâm ve kabûl-birle bedel-i iltizâmı olan meblağ-ı mezbûru vakt ü zamânıyla edâ ve teslîm etmek üzere Darbhâne-i âmirem hazînesine <> memhûr deyn temessükü vermeğin ber-minvâl-i muharrer mukāta‘a-i mezkûreyi sene-i merkūmeye mahsûben yed-i vâhidden zabt ü rabt ve idâre ve vâki‘ olan mahsûlât ve âidât ve rüsûmâtı kānûn-ı kadîm ve olageldiği <<üzere>> vechile cem‘ ve tahsîl ve ahz u kabz eyleyip taraf-ı âhardan müdâhale ve ta‘arruz olunmamak üzere yed-i vâhidden zabtı’çün emr-i şerîfim i‘tâsını mu‘teberân-ı ricâl-i Devlet-i aliyyemden hâlâ Darbhâne-i âmirem nâzırı iftihârü’l-emâcid ve’l-ekârim Mîr Hüseyin Hüsnü dâme mecdühû memhûr temessüküyle inhâ etmeğin imdi mûcebince amel <> olunmak fermânım olmuşdur. Buyurdum ki hükm-i şerîfim vardıkda bu bâbda sâdır olan emrim üzere amel edip dahi senki mevlânâ-yı mûmâ-ileyhsin nâzır-ı mûmâ-ileyhin <> inhâsına ibtinâen vech-i meşrûh üzere şeref-yâfte-i sudûr olan işbu emr-i âlîşânım mûcebince amel ve hareket birle mârru’z--zikr mukāta‘a-i mezkûreyi işbu bin iki yüz otuz sekiz senesi Martı ibtidâsından sene-i merkūme Şubat’ı gāyetine değin bir sene-i kâmile mültezim-i mûmâ-ileyh tarafından yed-i vâhidden zabt ü rabt ve idâre ve vâki‘ olan mahsûlât ve rüsûmât kānûn-ı kadîm ve ol[a] geldiği vechile cem‘ ve tahsîl ve ahz u kabz ve bedel-i iltizâmı olan meblağ-ı mezbûru vakt ü zamânıyla Darbhâne-i âmirem hazînesine edâ ve teslîm ettirdip taraf-ı âhardan müdâhale ve ta‘arruz olunmaması husûsuna mezîd-i ihtimâm ve dikkat eyleyesin. Şöyle bilesin alâmet-i şerîfe i‘timâd kılasın. Fî 20 Ca sene 1238 Kostantıniyyeti’l-mahmiyyeti’l-mahrûse.