İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 138 Hüküm no: 14 Orijinal metin no: [18a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Her meslek gurubu ve her bir sınıf kendilerine mahsus kıyafetlerin dışında bir şey giymemeleri Bâ-sahh-ı âlî. Cemî‘-i nâs ve eimme ve müstemirren kendilere mahsûs hey’et ve kıyâfetleriyle gezip tağyîr-i hey’et ve kıyâfet etmeleri lâzımeden iken biraz vakitden beri bu husûsa dikkat olunmadığından etbâ‘ makūlesinden vesâir san‘atdan ba‘zıları hey’et ve tebdîl-i kıyâfet ile başlarına şal sarmak ve kendilerin isbâtı ecnâs-ı kıyâfete girmek misilli evzâ‘a ibtidâr etmekde olmaları meşhûd ve ma‘lûm olup bu keyfiyet hilâf-ı rızâ ve âdet olmakdan nâşî olmağla her bir san‘at kendiye mahsûs hey’et ve kıyâfet ne ise ol kıyâfetde gezip tebdîl-i hey’et etmemeleri lâzımeden olarak bu sûretde bu vakt fermânlar ısdârıyla iktizâ edenlere başka başka tenbîh olunmuş olmağla imdi fîmâ ba‘d herkes kendiye mahsûs olan kıyâfetle gezip etbâ‘ ve paşalı <> vesâir esnâf kıyâfetlerini değişmek misilli evzâ‘dan ferâgat-birle her zümre hey’et-i mahsûsalarını ne ise ol kıyâfetle geşt ü güzâr eyleyeler cümlesine tenbîh ve i‘lâna mübâderet ve hilâfı hareket vukū‘a gelmemesini iktizâ edenlere ifâde eyleyesin deyü. Fî 11 Rebî‘ülâhir sene 1238.