İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 138 Hüküm no: 15 Orijinal metin no: [18a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yangınların önüne geçmek için kışın evlerde ısınma ve aydınlatma için yakılan ateşlere dikkat edilmesi Bâ-sahh-ı âlî. Mangal ve tenevvürlerin muhâfazasına tenbîh. El-hâletü hâzihî mevsim-i şitânın hulûlü cihetiyle her bir büyût ve mesâkinde tennûr ve ateş mevcûd olarak ekser-i ev[â]nda harîk zuhûru bu makūle tennûr [ve] ateşden ve ocakdan neş’et ede geldiği cümleye ma‘lûm olan mevâddan ve emr-i muhâfazasına i‘tinâ ve dikkat cümleye lâzımeden olduğundan bu husûs geçende bâ-fermân-ı âlî tenbîh olunmuş ise de el-hâletü hâzihî mevsim-i şitâ takrîbiyle gerek evlerinde olan mangal ve tennûr ve ocaklarına kemâliyle takayyüd ve ihtimâm eylemeleri ve icâbet-i hâliyeden olarak bu def‘a dahi mahsûs başka başka fermân-ı âlî ile Bilâd-ı selâse kādıları fazîletlü efendilere tekîd olunmuş olmağla imdi siz dahi eimme-i mahallâtı celb ederek herkes büyût ve mesâkininde olan mangal ve tennûrlarını açık bırakmayıp odalarında olan ateşlerine kemâliyle mukayyed ve ihtimâm etmelerini cümleye ifhâm ve tekîd olunması gereğ[i] gibi tenbîh[e] mübâderet eyleyesin deyü buyruldu. Fî 26 R sene 1238.