İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 139 Hüküm no: 17 Orijinal metin no: [18a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yerli ve yabancı paraları râyic fiyatından fazlaya alıp verenlerin cezalandırılması Bâ-sahh. Akçe yasağı. Sikke-i hasene-i cenâb-ı pâdişâhî ve düvel sikkeleriyle meskûk ve [e]cnâs-ı altın ve nukūd vesâirenin mukaddemâ karâr-gîr olmuş olan fiyatdan ziyâde alınıp verilmesi husûsu bi’d-defa‘ât fermânlar ısdârıyla herkese tenbîh ve tekîd olunmuş ve hilâfına cesâret edenler bi’t-taharrî ahz u girift ile tedîbâtı lâyıkaları icrâ kılınmış ise de el-hâletü hâzihî erbâb-ı hiyel ihtikârına bu günlerde râyic-i nukūdu hafî ve celî ifsâd ederek ziyâde alıp vermekde oldukları ihbâr ve tahkīk kılınmış olup işbu fiyat-ı nukūd maddesine i‘tinâ ve dikkat cümle me’mûrîne lâzıme-i zimmet olup şöyle ki; bu husûsa dikkat olunmaması mu‘âmelât-ı nâsın ihlâl ve ifsâdını ve emvâl-i mîrîyenin adem-i husûlünü mûcib olarak her bir alış-verişde ibâdullâhın mübtelâ-yı zarâr ve ıstırâb olunmasını müntic olacağından bu emr-i ehemme kemâliyle ihtimâm olunarak bir sûretde hafî ve celî erbâb-ı ihtikârın ziyâde alıp vermesi ve mecmû‘-ı altın ve akçenin mukaddemâ verilen nizâm üzere alınıp verilmesi lâzımeden ve bundan sonra hilâfı harekete cesâret edenler ve ruhsat verenler her kim olursa olsun bi’t-taharrî ahz ü giriftâr olundukda siyâsetle ibret kılınacakları vâzıhâtdan olarak bu def‘a vakt ü keyfiyet iktizâ edenlere başka başka fermânlar ısdârıyla teyîd ve [te]kîd kılınmış olunmağla imdi siz dahi râyic ve nukūd maddesinin rastvâr-ı nizâmında zerreten mâ igmâzdan ve tesâmüh sûretleri tecvîz olunmayarak ale’d-devâm hafî ve celî taharrî ve tahkīke kemâliyle ihtimâm ve dikkat ile hilâf-ı emr-i âlî harekete cesâret edenler ele girdikde derhâl Bâb-ı âlî’ye irsâl olunarak nizâmın istikrâr ve sebâtına i‘tinâ olunacağını iktizâ edenlerin <> gûş u hûşlarına [gûş-ı hûşlarına] gereğ[i] gibi tefhîm ve ilkāya mübâderet eyleyesin deyü. Fî 10 Ca sene 1238.