İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 141 Hüküm no: 19 Orijinal metin no: [18b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Adlî altının dışında ikilik ve diğer paraların İstanbul dışına çıkarılmasına izin verildiği İstanbul kādısı fazîletlü efendi. Ecnâs-ı altın ve nukūdun fî-i mukarrereleri istikrârıyla bir akçe ziyâdeye alınıp verilmemesi ve taşra bir takrîb altın ve akçe kaçırılmaması husûsu bundan çend rûz akdemce bâ-fermân-ı âlî cümleye tenbîh olunmuş ise de tâife-i tüccârın tevsî‘-i dâire-i ticâret ve teshîl-i umûr-ı dâd u sitedleri’çün birkaç cins akçenin istisnâ kılınması lâzım gelmiş olduğundan erbâb-ı ihtikârın tezâyüd-i fiyata cesâret eylememesiçin Adlî tesmiye olunan on ikilik altın ve nısfiyyesi ve atîk ufak paranın taşra gönderilmesine mesâğ ve ruhsat-ı seniyye derkâr buyrularak onlardan mâ‘adâ rub‘iyye ve iplik [ikilik] vesâir ecnâs-ı nukūdun taşra gönderilmesi men‘-i küllî ile men‘ olunup bu husûs bu def‘a iktizâ edenlere mahsûs fermânlar ısdârıyla tenbîh ve tekîd olunmağla imdi ba‘d ez-în li-ecli’t-ticâre taşra gönderilmesine ruhsat-ı seniyye şâyân buyrulan mârru’z--zikr Adlî ve nısfiyyesi ve atîk ufak paradan mâ‘adâ rub‘iyye ve iplik [ikilik] vesâir ecnâs-ı nukūdun taşra gönderilmesine ve ecnâs-ı altın ve nukūdun fiyat-ı mukarrerelerinden bir akçe ziyâdeye altın [alınıp] verilmesine kemâl-i ihtimâm ve dikkat ve kâğıdlar ile te‘âmül olunan ufak para noksan olmaması ve içinde kalb olmayıp gerek taşraya gitmesine ruhsat verilen mârru’z--zikr Adlî tâm ve nısfiyyesiyle ufak paradan başka cinsinin bir takrîb taşra kaçırılmasına ve gerek bundan sonra kâğıdlarıyla te‘âmül olunan parayı kalb ve noksan vermeğe her kim cesâret eder ise tedîb-i lâyıkasının icrâsına dakīka fevt olunmayacağını iktizâ edenlere ifâde ve emr-i tâm-birle işbu nizâmın devâm ve istikrârı husûsuna kemâl-i gayret ve ikdâm eyleyesiz deyü. Fî 25 Ş sene 1238