İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 142 Hüküm no: 20 Orijinal metin no: [18b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Koyun eti narhı Bâ-sah. İstanbul kādısı fazîletlü efendi. Âsitâne-i sa‘âdet’de sâkin ibâdullâhın sâye-i şevket-vâye-i hüsrevânemde ezher cihet fesâddan vikāyeleri lâzımeden ve lehü’l-hamd ve’l-minne yümn-i teveccühât-ı kudsiyye-i cenâb-ı pâdişâhî iktizâsından olarak bu sene-i mübârekede Rumeli ve Anadolu câniblerinden Dersa‘âdet’e vâfir üzere ağnâm tevârüd eylemekde olduğundan ibâdullâha fürûht olunan lahmın narhı cârîsinden biraz tenzîlinde hem celebân ve kassabân tâifesine bir nev‘ ziyân tertîb etmeyeceği hem ibâdullâhın hasârât[dan] vikāyesiyle isticlâb-ı da‘avât-ı hayriyyeyi mûcib olacağı bedîhiyâtdan olarak bu husûsun bir taht-ı râbıtaya tevsîki îcâb-ı hakkāniyetden olmağla işbu şehr-i Zilhicceti’ş-şerîfenin yirmi üçüncü gününden i‘tibâren kassabân tâifesi lühûmun beher kıyyesini celeb tâifesinden otuz ikişer paraya alıp kassabân dahi üçer para zammıyla ibâdullâha otuz beşer paraya bey‘ eylemeleri lâzım gelenlere tenbîh eylemesi vezîr-i mükerrem sa‘âdetlü ağa paşa hazretlerine bâ-fermân-ı âlî tenbîh olunmuş olmağla siz dahi keyfiyeti iktizâ edenlere ekîden tenbîh ederek ol vechile celeb tâifesinden otuz iki paraya alınıp ibâdullâha otuz beşer paraya fürûht olunarak ziyâde satılmaması ve bu cihetle dahi tevsî‘ ve dâire-i ma‘âş-ı ibâdı mûcib esbâbın ikmâli husûsuna dikkat ve mübâderet eyleyesiz deyü. Fî 21 Zilhicce sene 1238.