İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 145 Hüküm no: 22 Orijinal metin no: [19a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kadınların açık renkli ve süslü elbiseler giyerek gezmelerinin yasaklandığı bu tür elbise dikenlerin cezalandırılacağı Bâ-sah. İstanbul kādısı fazîletlü efendi. Cemî‘ zamânda nisvân tâifesinin zînet-i edebiyye? ve kıyâfet-i afîfe ile gezmeleri lâzımeden iken bu evânda tâife-i nisvân hadd-i i‘tidâlden hâric vaz‘-ı nâ-hemvâre cesâret ederek gāyet açık renkli ferâceler ihdâs ve etekleri ile yakalarını dürlü dürlü oymalar ve envâ‘-ı harclar ile zînet edip mecma‘-ı nâs olan esvâk ve bâzâr ve mesîrelerde gezmekde oldukları meşhûd olup bu husûs nice fesâd ve sefâhate bâ‘is ve bâdî ve iffet ve ismete münâfî olduğuna binâen ba‘de ez-în gürûh-ı nisvânın al ve sarı ve hazânî ve gülgûnî vesâir bu misilli gāyet açık ve bed-renkli ve kolları envâ‘-ı oyma ve dürlü harc ile mu‘anven [19b] ve yakaları hadd-i i‘tidâlden hâric <> uzun ferâceler ve ehl-i İslâma yakışmayan nev‘ îcâd hotoz giymemeleri ve ba‘zı acîb hey’et ve İslâma yakışmayan kıyâfetler ile gezmemeleri ve o makūle yaka ve kol ve etekleri oyma ve açık bed-renk ferâce giyen ve ehl-i İslâma yakışmayan hey’et ile gezenlerin tekdîr ve tedîb olmaları irâde olunarak <> tâife-i nisvân her kim olursa olsun ol vechile hadd-i i‘tidâlden hâric uzun yakaları ve oymaları ve bed-renkli ferâce ile görüldüğü gibi derhâl ferâcesinin yaka ve etekleri kesilip kendisi terbiye olunmak üzere iktizâ eden zâbitâna başka başka fermân-ı âlî ısdârıyla tenbîh kılınmış olmağla imdi siz dahi bu vechile keyfiyeti evlerinde olan nisâ tâifesine etrâfıyla ifâde ve tenbîh etmek üzere <> mahallelerinde olan ahâlîye <> gereği gibi ifhâm eylemelerini eimme-i mahallâta ifâde ederek fîmâ ba‘d gürûh-ı nisvânın mugāyir-i irâde etvârdan nâşî nesne ile gezmemelerini tenbîhe dikkat ve o makūle oymalı ve dürlü dürlü bed-renkli ferâceler dikmemelerini ve diken ve ba‘zı çukadâr üzerine müşebbek oymalar yapan kimler ise bi’t-taharrî tahkīk olunduğu hâlde tedîbât-ı şedîde ile tedîb olunacaklarını dahi derzi esnâfına tenbîh ve tefhîme mübâderet ile işbu yasağın ale’d-devâm düstûrü’l-amel tutulması vesâilinin istihsâline mübâşeret eyleyesin deyü. Fî 28 M sene [1]239.