İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 146 Hüküm no: 23 Orijinal metin no: [19b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Piyasada bulunan para ve saf gümüşün geçerli olan fiyatından fazlaya alıp verenlerin cezalandırılacağı İstanbul kādısı fazîletlü efendi. Bâ-sah. Eyâdi-i nâsda mütedâvil olan ecnâs-ı altın ve nukūdun fiyat-ı mukarrerelerini tecâvüzü kâffe-i mu‘âmelâtın ifsâdını mûcib olduğundan bu husûs men‘-i küllî ile men‘ olunarak fîmâ ba‘d her nev‘ altın ve nukūd mukaddem karâr-gîr olan fiyatından bir habbe ziyâdeye alınıp verilmemek ve taşraya altın akçe kaçırılmamak husûsu mukaddem ve muahhar cümleye fermânlar ile ısdârıyla tenbîh olunmak ve aralık aralık ele girenlen tedîb ve tahzîr kılınmışiken yine dâne guruş Âsitâne’de taşrada altmış paraya ve rub‘u on beş yirmi paraya cârî olduğu ve bu keyfiyet giderek simin fiyatına halel vereceğine binâen cemî‘-i eşyâ ve mu‘âmelât fesâd tareyânına bâdî ve bâ‘is ve cümleye mazarratı mevrûs ve envâ‘-ı mehâzîri mütenebbi‘ olacağı ecilden dâne guruşun Darbhâne-i âmire fiyatından ziyâdeye cârî olmasından dolayı tahaddüs eden işbu fesâdın inkıtâ‘ıyla sâir ecnâs-ı altın ve nukūdun fiyat-ı mu‘ayyenelerinin istikrârı râbıtasının istihsâli lâzım geldiğinden bu def‘a ittifâk-ı-ârâ ile karâr verildiği ve taraf-ı şer‘-i enverden verilen fetvâ-yı şerîfden muktezâsı üzere on ayârı sim ve hâlis zam ve ol vechile altmış bir ayârına iblâğ ve bahâsı kıymet-i lâyıkası derecesine irtifâ‘ ve idhâl olunarak altmış bir ayârına cedîd altmış kat‘ olunup dâne guruş ve rub‘ kat‘ ve darbolunmamak ve bu vechile ayâr zammıyla bahâsı uydurularak cedîd altmışlık kat‘ ve darbına karâr verilmekden maksûd-ı aslî mücerred fiyatın fîmâ ba‘d halel ve tezâyüdden vikāye ve muhâfazası garazına mebnî olmak üzere mülâbesesiyle ba‘d ez-în işbu cedîd kat‘ olunacak altmışlık altmış paraya ve mukaddem kat‘ ile eyâdî-yi nâsda mevcûd mütedâvil olan dahi guruş kırk paraya ve rub‘ on paraya ve Adlî rub‘iyyesi yüz paraya ve sim-i hâlisin dirhemi otuz iki paraya vesâir sikke-i hasene-i şâhâne ve düvel sikkeleriyle meskûk olan ecnâs-ı altın ve sim dahi mukaddemki karâr-gîr olan fiyat-ı ma‘lûmesi üzere alınıp verilmek ve bundan sonra bir akçe ziyâdeye alıp veren ele çekildikde siyâsetle mücâzât olunmak ve me’mûrîn ve zâbitândan dahi ihmâl ve müsâmaha edenler olur ise tedîb-i şedîd ile tedîb kılınmak husûslarına irâde-i kātı‘a-i şâhânem ta‘allukuyla keyfiyet iktizâ edenlere bâ-fermân-ı âlî tefhîm ve tenbîh olunmuş olmağla fîmâ ba‘d ecnâs-ı altın ve nukūdu fiyat-ı mukarreresinden bir akçe ziyâdeye alıp vermeğe her kim cesâret eder ise günahı boynuna hakkında icrâ-yı siyâset olunacağı bî-iştibâh olduğunu cümleye i‘lân ve tefhîm ve bilinmez hey’etle mahsûs câsuslar ta‘yîn olunarak taharrî olunacağını dahi iktizâ edenlerin gûş-ı intibâhlarına gereği gibi beyân ve telkīn ile ona göre ecnâs-ı nukūd ve sim-i hâlisin bâlâda muharrer fiyat-ı mukarreresinden bir akçe ziyâdeye alınıp verilmemesi ve dâimâ taharrî-birle ba‘d ez-în zinhâr ve zinhâr hilâfı hareket vukū‘a gelmemesi emr-i ehemmine kemâl-i takayyüd ve dikkat eyleyesin deyü. Fî 15 Ra sene [1]239.