İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 147 Hüküm no: 24 Orijinal metin no: [19b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Piyasada bulunan Adlî altının kalpazanlar tarafından taklidinin yapılmasının zorlaştırılması için yeniden darbedilmesi Bâ-sah. İstanbul kādısı fazîletlü efendi. El-hâletü hâzihî Darbhâne-i âmirede kat‘ ve darb olunup tammı on iki ve nısfı altı guruşa ve rub‘iyyesi yüz paraya râyic olan Adlî altını fî-i mukarreri üzere alınıp verilmekde ve ale’d-devâm teshîl-i mu‘âmelât-ı nâs zımnında neşrolunmakda ise de zikrolunan altının yazısı çıblakca ve taklîdi âsân olduğundan bir takım kalpazan tâifesi taklîd etmekde ve Rumeli ve bi’l-husûs adalar eşkıyâsından kalpazan çoğalarak taklîden kalb altın yapmakda ve bu cihetle ortalıkda kalb altın çoğalmakda olduğundan ve sikke maddesi husûsât-ı sâireye bir sûretle kıyâs olunmayıp usûl ve nizâm-ı Devlet-i aliyyeye dokunur şey olarak fesâd-ı mezkûrun önü kesdirilip bir râbıta-i kaviyyeye rabt ve tensiki lâzımeden idiğinden bundan böyle evvelki resm üzere Adlî tâm ve nısfı ve rub‘iyyesi kat‘ ve darb olunmayarak vezn ve ayârı yine ol vechile olmak ve fakat yazısı hurde ve san‘atlı ve kolaylıkla taklîd kabûl etmeyecek resm ve sûretle tammı <> on iki ve nısfı altı guruşa ve rub‘u yüz paraya olmak üzere cedîd sikke ihtiyâr ve ol vechile kat‘ ve darb olunduğu hâlde hem bey‘ ü şirâda derkâr olan mazarrat-ı fesâdın indifâ‘ı ve hem o makūle kalb altınların ahz u i‘tâda kalbının fark ve temyîzi âsân olacağı nümâyân olacağından [20a] mukaddem kat‘ ve darb olunan Adlî tâm ve nısfının ve rub‘iyyesinin resmi terk ile ba‘d ez-în işbu resm-i cedîd üzere darbolunması ve o misilli mağşûş ve kalb altın alınıp verilmemesi husûsları bu def‘a ittifâk-ı ârâ ile karâr-gîr olarak irâde-i seniyye-i mülûkâne dahi bunun üzerine ta‘alluk etmiş ve keyfiyet iktizâ edenlere fermân-ı âlî ile tenbîh olunmuş olup ancak bu sûretle cedîd sikke ihtiyâr ve darb olunması ve sâlifü’z-zikr Adlî tâm ve nısfı ve rub‘iyyesinin resm-i evveli terk ile cedîd ve musanna‘ resim ihtiyâr ve tanzîmi mücerred erbâb-ı ihtikârın ve o makūle usât takımının sikke-i hasene-i şehriyârîye taklîd edememesi ve bey‘ u şirânın fesâddan kurtarılması garazlarına mebnî olmağla imdi fîmâ ba‘d evvelki vezn ve ayârda kat‘ ve darb olunacak işbu cedîd altınların vesâir sikke-i hasene-i şâhâne ve düvel sikkeleriyle meskûk envâ‘-ı altın ve nukūdu vesâirenin irâde-i nizâmından bir akçeye ziyâdeye alınıp verilmemesi ve o misilli Adlî tâm ve nısfını ve rub‘iyyesini alıp verenler kemâliyle dikkat edip kalb ve hâric zuhûrunda alıp vermekden be-gāyet tehâşî ve mücânebet-birle bu husûsun ilâ-mâşâallâhu te‘âlâ düstûrü’l-amel tutulmasını îcâb edenlere tefhîme dikkat ve siz dahi dâimâ nezâret eyleyesin deyü. Fî 21 R sene [1]239.