İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 158 Hüküm no: 37 Orijinal metin no: [23a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avrupa’dan gelen Tevrat, Zebur ve İncil’in girişinin engellenmesi Sahaflar çarşısında satışının yasaklanması ve halkın elinde olanların da toplatılması emri Bâ-sah. İstanbul kādısı fazîletlü efendi. Bu esnâda Frengistân tarafından beherinden ikişer üçer bin cild olmak üzere Tevrat ve Zebur ve İncil kitâbları ve zeylinde havariyûn hikâyâtı ve Fârisiyü’l-ibâre bir risâle tab‘ olunduğu tahkīk olunmuş ve hattâ bunlardan bir iki yüz kitâb ile beş altı kıt‘a risâle Dersa‘âdet’de vürûd etmiş olup bu sûret envâ‘-ı mahâziyi ve akāyid-i a‘vâm-ı nâsın bir nev‘ ihlâl ve ifsâdını mûcib bir keyfiyet olduğundan ve cemî‘ zamânda Memâlik-i mahrûsede bu makūle şeylerin men‘-i küllî ile men‘i vâcibâtdan idiğinden kütüb-i mezkûrenin yine Frengistân’a i‘âdesiyle ba‘d ez-în o makūle kitâb gelir ise gümrük tarafında tevkīf ve ihbâr olunması ve Dersa‘âdet’de Sahaf çarşısında alınıp satılmayıp sâir mahallerde dahi o makūle kitâbları ehl-i İslâmdan hiç kimesne almayıp her kimde bulunur ise yedlerinden ahz ve ateşe ilkā ve ihrâk olunarak bir mahalde fürûht ve istishâb ettirilmemesi husûsuna irâde-i seniyye-i mülûkâne ta‘alluk edip ol bâbda sahîfe-pîrâ-yı sudûr olan hatt-ı hümâyûn-ı şevket-makrûn-ı şâhâne mûcebince husûs-ı mezkûr zımnında Memâlik-i mahrûseye evâmir-i aliyye ısdâr ve tisyâr ve ba‘d ez-în gümrüğe o makūle kitâb gelir ise tevkīf ve ihbâr eylemesi husûsu gümrük emîni efendiye dahi bâ-buyruldu tavsiye ve iş‘âr kılınmış olmağın imdi siz dahi Sahaf çarşısında kütüb-i mezkûrenin alınıp satılmaması husûsuna dikkat eylemelerini lâzım gelenlere tenbîh ve tekîde ikdâm ve icrâ-yı muktezâ-yı irâde-i seniyyeye sarf-ı reviyyet ve ihtimâm eylesin deyü. Fî 16 L sene [1]239 Temme bi-hüsni tevfikihî te‘âlâ (Mühür) Seyyid Ca‘fer Fevzi (…) ola