İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 162 Hüküm no: 42 Orijinal metin no: [23b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kayıkçı esnafının gidecekleri iskelelere göre fiyat tarifelerinin yenilenmesi Bâ-sah. İstanbul kādısı fazîletlü efendi Kayıkçı tâifesine dâir. Kayıkçı tâifesi ve bâzâr kayıkçıları rüesâsı narhsız ve terâzisiz esnâf olup kendilerinde aslâ insâf olmadığından ibâdullâhın ihtiyâcını gördükleri gibi murâdları mikdâr ücretlerini aldıkça irkâb ve imrârda inâd ve ısrâr ve cümleyi ızrârda oldukları zâhir ve âşikâr olmak hasebiyle bundan akdem bu husûsa bir nizâm ve yevmiyyelerine ve üç çifte ve iki ve bir çifte kayıkların ahşama kadar yevmiyyeleri ve bir iskeleden diğer iskeleye ‘an ve ilâ-tasrîhiyle ücretlerinde ve bâzâr kayıklarının dahi Boğaziçi’nden Dersa‘âdet’e geliş ve gidiş sibâk olarak mikdâr ta‘yîn kılınmış ve nizâmının devâm ve istikrâriçin buyur[ul]dular yazılmışiken mürûr-ı zamân ve tebeddül-i zâbitân sebebiyle nizâmlarını tecâvüz ve hâlâ hâric ez-adl ve insâf ücretlerini zı‘fından efzûn mertebeye iblâğ etmiş oldukları ecilden bunların ücretleri mikdârına ez-ser-i nev bir nizâm verilmesi mühim ve muktezî olmağla imdi Boğaziçi ve Üsküdar vesâir dâhil-i nezâretinizde olan mahallerde kâin iskelelerin kayıkçılar kethüdâlarını bi’l-cümle bâzâr kayıkçılarının reislerini bi’l-ittifâk nezdinize celb ve sicillâtda merkūm olan fiyatlarını tefhîm ve iktizâ eder ise vakte göre ta‘dîl ederek bir mikdâr-ı mu‘ayyene tevsîk ile ez-ser-i nev defter ettirip defterini huzûrumuza takdîme mübâderet eyleyesin deyü. Fî 7 Z sene [1]239