İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 162 Hüküm no: 43 Orijinal metin no: [24a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’a fazla miktarda koyun gelmesinden dolayı koyun etinin geçerli fiyatından biraz daha ucuza satılması Bâ-sah. İstanbul kādısı fazîletlü efendi Kasab esnâfına lahmın ibâdullâha 31 paraya bey‘ine tenbîh. Dârü’l-hilâfeti’l-aliyye’de dahi ibâdullâhın sâye-i tûbâ-vâye-i şâhânede ezher cihet terakkub ve âsâyişleri vesâilinin istihsâline i‘tinâ ve dikkat [ve] kurbet-i zimmet [ve] himmet olduğu inkâr ve lillâhi’l-hamd bu sene-i mübârekede Rumeli ve Anadolu câniblerinden Dersa‘âdet’e kesret üzere ağnâm tevârüd etmekde kısır olmayıp arık olmaması cihetiyle vakıyyesinde dahi fark olduğundan fürûht olunan lahmın narh-ı cârîsinden biraz tenzîl hem celebân ve kasab tâifesine bir nev‘ ziyân terettüb etmeyeceği ve hem ibâdullâhın hasârdan vikāyesiyle isticlâb-ı da‘avât-ı hayriyyeye mûcib olacağı bedîhî ve nümûdâr olarak bu husûsun bir taht-ı râbıtaya tevsîki îcâb-ı hakkāniyetden olmağla işbu Zilka‘deti’ş-şerîfesinin yirmi beşinden i‘tibâren kassabân tâifesi lühûmun beher kıyyesini celeb tâifesinden yirmi sekiz paraya alıp kassabân dahi üç para zammıyla otuz birer paraya bey‘ eylemelerini lâzım gelenlere ekîden tenbîh ederek ol vechile celeb tâifesinden yirmi sekiz paraya alınıp ibâdullâha otuz birer paraya fürûht olunarak ziyâdeye satılmaması ve bu cihetle dahi tevsî‘-i dâire-i ma‘âş-ı ibâdı müstetbi‘ olur ise pek ikmâli husûsuna mübâderet eyleyesin deyü. Fî 25 Za sene [1]239.