İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 163 Hüküm no: 44 Orijinal metin no: [24a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamalların taşıma ücretlerinin tespiti Bâ-sah. İstanbul kādısı fazîletlü efendi Hamal tâifesine narh. Hammâlân tâifesi narhsız ve terâzisiz esnâf olup kendilerinde aslâ insâf olmadığından ibdâdullâhın ihtiyâclarını gördüklerinde murâdları mikdâr ücret olmadıkça hamûle yüklenmeyip ücretleri ba‘zan hamûlelerinin esmânını güzâr ve cümleyi ızrârda oldukları zâhir ve âşikâr olmak hasebiyle bundan akdem bu husûsa bir nizâm ve arka hamalları bârgir ve hımâr hamallarının her bir mahalde n her bir mahalle ‘an ve ilâ-tasrîhiyle hammâliyelerine ta‘yîn gelinmiş nizâmın devâm ve istimrârı’çün buyruldular yazılmışiken mürûr-ı zamân ve tebeddül-i zâbitân vesîlesiyle nizâmlarını tecâvüz ve hâlâ hâric ez-adl ve insâf hammâliyelerini zı‘fından efzûn olunmuş oldukları ecilden bunların ücret-i hammâliyelerine ez-ser-i nev bir nizâm verilmesi mühim ve muktezî olmağla imdi İstanbul havâlîsinde kâin iskelelerin hamallâr kethüdâlarını bi’l-ittifâk nezdinize celb ve sicillâtda merkūm ve mukayyed olan fiyat ve mikdâr ve nizâmlarını tefhîm ve iktizâ eder ise vakte göre ta‘dîl ederek bir mikdâr-ı mu‘ayyene dahi rabt ve tevsîk ile ez-ser-i nev defter ettirip defterini huzûrumuza takdîme mübâderet ve nizâmlarının devâm ve istikrârına ihtimâm ve dikkat eyleyesin deyü. Fî 25 Za sene [1]239