İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 163 Hüküm no: 45 Orijinal metin no: [24a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kurbanda kesilecek hayvanların sakatat ve artıklarının sokak aralarına bırakılmaması ve bayram dolayısıyla kadınların çarşı pazarda gezmemeleri Bâ-sah. İstanbul kādısı fazîletlü efendi Îd-i adhâ’da sokak tathîri. İşbu adhâ-yı meserret-fezâda zebh olunacak kurbânların baş ayak ve ciğer ve fazalâtları miyân-ı esvâk ve bucaklara ilkā ile râyiha-i kerîhiye hudûsuna sebeb ve illet olanların ve bâ-fermân-ı âlî memnû‘âtdan olan nisvân tâifesinin esvâk ve bâzâr ve mahallât aralarında geşt ü güzâr edeni men‘ [ve] def‘i mühim ve muktezî olmağla imdi mahallât imâmlarını meclis-i şer‘a da‘vet işbu îd-i şerîfin ibtidâki gününden hitâmına kadar nisvân tâifesi esvâk ve bâzâr ve mahallâtda geşt ü güzâr etmeyip hânelerinde karâr ettirilmesi ve kurbânların baş ayak ve ciğer ve fazalâtları miyân-ı esvâk ve bucak ve köşelere ilkā olunmaması husûslarını tenbîh ve tekîde mübâderet ve her kim fermân-ı âlîye mugāyir hareketde bulunur ise gereği gibi tedîb olunacağı muhakkak idiğini her bir imâma başka başka mahallesi ahâlîsine tefhîm ve ifâdeye mübâderet eylemeleriçin cümlesine mazmûn-ı fermân-ı âlîyi i‘lân ve işâ‘at eyleyesin deyü. Fî 9 Z sene [1]239