İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 164 Hüküm no: 47 Orijinal metin no: [24a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avrupa tüccarından müste’min Kayserili Hıdır oğlu Agop ve iki hizmetkârına verilen muafiyet berâtı Akzâ kuzâti’l-Müslimîn evlâ vülâti’l-muvahhidîn ma‘deni’l-fazli ve’l-yakīn râfi‘u a‘lâmi’ş-şerî‘ati ve’d-dîn vâris-i ulûmi’l-enbiyâi ve’l-mürselîn el-muhtassu bi-mezîd-i inâyeti’l-Meliki’l-Mu‘în Mevlânâ İstanbul kādısı zîdet fezâilihû tevkī‘-i refî‘-i hümâyûn vâsıl olıcak ma‘lûm ola ki Avrupa ve Acem ve Hindistan ticâretiyle me’lûf olan ve bundan akdem izhâr-ı hâhiş ve arzu eden Devlet-i aliyyem re‘âyâsı tüccârlarının taht-ı râbıta ve nizâma idhâlleri husûsuna irâde-i seniyyem ta‘alluk eylediği cihetden müste’min <> tercümânları ve hizmetkârlarının nâil oldukları imtiyâzât ve emniyyet ve müsâ‘ade ve ri‘âyet tamamen bunların bilâ-istisnâ icrâ kılınması rüsûm-ı ra‘iyyet-i perverîden olduğu ecilden o makūle Avrupa tâcirleri ve hizmetkârları yedlerine başka başka berevât ve evâmir i‘tâ olunması husûsu bâ-hatt-ı hümâyûn verilen şürût nizâmından ve defterli tüccârdan Dersa‘âdetimde Vâlidehânı’nda mütemekkin Kayseriyeli Hıdır oğlu Agop nâm tâcir yedine şürût-ı nizâm üzere <> mefâsil ve şürûh ticâret berâtı i‘tâ olunduğuna binâen Devlet-i aliyyem re‘âyâsından olmak üzere mersûmun iki nefer hizmetkârlarından Magdisi Abraham v. Hıdır bir nefer hizmetkârı şürût-ı berâtı mûcebince himâyet ve sıyânet olunmak bâbında emr-i şerîfim sudûrunu tüccâr vekîlleri memhûr arzuhâlleriyle istid‘â eylediklerin tüccâr-ı mersûmun nâzırı olan Dîvân-ı Hümâyûnum Beylikcisi kıdvetü’l-emâcid ve’l-ekârim es-Seyyid Mehmed Hâdi zîdet mecdühû bâ-takrîr ifâde etmekle Dîvân-ı Hümâyûn’umda mahfûz nişan kaydına mürâca‘at olundukda tâcir-i mersûm Avrupa tüccârından olmak üzere işbu sene-i mübâreke evâil-i Saferi’l-hayrında yedine mufassalan berât-ı şerîfim verildiği mukayyed olup müste’minânın berâtlı tercümânları ve hizmetkârları misilli Avrupa ve Acem ve Hindistan tüccârı olanlar ve oğulları ve başka başka yedlerine evâmir-i şerîfem verilen iki nefer hizmetkârları ancak avârız ve kassâ[biye] akçesi vesâir rüsûm ve tekâlif-i örfiye teklîfi ile te‘addî ve rencîde olunmamaları nizâmlarından olmağla vech-i meşrûh üzere amel olunmak fermânım olmağın imdi tâcir-i mersûmun ancak iki nefer hizmetkârlarından mersûm Magdisi Abraham v. Hıdır tâcir-i mersûmun hizmetinde olup şürût-ı nizâmları mûcebince evsat i‘tibârıyla fermânlı hizmetkârların veregeldikleri cizyeyi otuz iki târihi zamîmesinden başka bu def‘a iki yüz kırk senesi Muharrem’inden i‘tibâren umûmî vâki‘ olan zamm-ı cedîde ile ma‘an beher sene nâzırları ma‘rifetiyle Âsitâne cizyedârına teslîm eyledikce cizyedâr [24b] ve kolcuları tarafından kâğıd i‘tâsı vesîlesi ve mutâlebât-ı mezkûre ile te‘addî ve rencîde ettirilmeyip ber-mûceb-i şürût-ı berât himâyet ve sıyânet olunmak bâbında fermân-ı âlîşânım sâdır olmuşdur. Buyurdum ki hükm-i şerîfim vusûl buldukda bu bâbda vech-i meşrûh üzere şeref-yâfte-i sudûr olan fermân-ı vâcibü’l-ittibâ‘ım ve lâzımü’l-imtisâlimin mazmûn-ı itâ‘at-makrûnuyla amel ve hareket ve hilâfından tevakkī ve mübâ‘adet eyleyesin. Şöyle bilesin alâmet-i şerîfe i‘timâd kılasın. Tahrîr[en] fî-evâili Saferi’l-hayr li-sene erba‘în ve mi’eteyn ve elf. El-Kostantıniyyeti’l-mahmiyyeti’l-mahrûse.