İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 170 Hüküm no: 50 Orijinal metin no: [25a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Buğday fiyatlarında yapılan indirim dolayısıyla ekmeğin fiyatına ve ağırlığına dikkat edilmesi emri İstanbul kādısı fazîletlü efendi ve Zahîre nâzırı efendi Bu sene-i mübârekede lillâhi’l-hamd Memâlik-i İslâmiye’de ve ale’l-husûs Alçaklar ve Bogos iskelelerine merbût kazâlarda âsâr-ı feyz ü bereket dergâh [derkâr] olup sinîn-i sâbıkā fiyatından tenzîliyle kat‘-ı fiyat olunmak irâdesine mebnî Alçaklar Arnabud ve Müstakim hıntalarının beher Alçaklar kilesinden birer guruş ve Kızılca hıntasından otuzar para ve Alçaklar kilesinden nısfı i‘tibâr olunduğuna binâen bir guruş kilesinden yirmi beşer para bâyi‘ ve müşteri beynlerinde bi’t-terâzî tenzîl olunarak kat‘-ı fiyat olunmuş ve mûcebince bi’l-cümle kapan tüccârı yazıcıları iştirâ ve sefînelere tahmîlen Dersa‘âdet’e irsâl ve irsâl eyledikleri tahkīk kılınmış olup bu vechile erbâb-ı zirâ‘atın ve mesârifât mahsûlü getirdikleri zahîrelerinden rızâlarıyla fiyatlarından tenzîl olunduğuna nazaran fîmâ ba‘d tenzîlât-ı mezkûrenin iktizâsı üzere beher keyl-i İstanbulî’de cârî olan kıymetin sülüsü tenzîliyle habbâzân esnâfına tevzî‘ olunmak lâzım geleceğine mebnî Kapanbaşı efendi vesâir lâzım gelenler celb ile iktizâsı vechile beher keyl-i İstanbulî’den cârî olan kıymetin sülüsü tenzîl olunarak esnâf-ı merkūmeye tevzî‘ olunmak üzere tenbîh ve bu vechile Kapan sicillâtına müsbet ve kayd ettirilerek ale’d-devâm nizâm-ı mezkûrun icrâsına dikkat ve nezâret ve hilâf-ı harekete cesâret ederi olur ise li-ecli[t-te’]dîb isim ve şöhretiyle keyfiyetleri i‘lâm ve ifâdeye mübâderet olunması bâbında fermân-ı âlî sudûr etmiş ve mûcebince zehâyir-i mezkûre fiyatı tenzîl olunarak tevzî‘ine ibtidâr olunmuş ve bu cihetle Âsitâne-i sa‘âdet ve Bilâd-ı selâsede tabh ve i‘mâl olunan nân-ı azîzin dirhemine zam ile doksan dirhemden ziyâdeye iblâğı îcâb etmiş ise de habbâzân esnâfının mukaddemâ Anbâr-ı âmireden aldıkları zahîre bahâsından dört bin kîseden mütecâviz zahîre hazînesine zimmetleri ve külliyetli kapan tüccârına düyûnları olduğundan refte refte tediye-i deyn eylemek ve tabh edecekleri nân-ı azîzin sikke ve dirhemine kemâliyle ihtimâm ve dikkat edip fîmâ ba‘d vezninde noksan ve sikkesi bozuk nân-ı azîz işleyen düyûn-ı atîka ve cedî[de]lerinin edâsında tereddüd ve betâet eyleyen olur ise haklarından gelinmek şartıyla el-hâletü hâzihî i‘mâl olunan yetmiş dört dirhemin üzerine altı dirhem zam ve ilâve ile seksen dirheme iblâğı husûsuna irâde olunmağla mûcebince Kapan nâibi ve Habbâzân kethüdâ ve nizâm ustalarını celb ile işbu irâdeyi gûş-ı hûşlarına ilkā ve ekîden tenbîh ve tefhîm ve kavî ta‘ahhüde rabt ve tevsîk keyfiyeti i‘lâma müsâra‘at eyleyesin deyü. Fî 5 S sene [1]240.