İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 171 Hüküm no: 51 Orijinal metin no: [25a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kahve fiyatlarında indirim yapılması İstanbul kādısı fazîletlü efendi. Lillâhi’l-hamd ve’l-atâyâ sâye-i mekârim-velâye-i hazret-i pâdişâhîden Dârü’l-hilâfeti’l-aliyye sekenesinin evkāt-ı [akvât-ı] yevmiyye ve mâkezme-i sâ’et [malzeme-i sâire] husûsunda bir gûne zarûret ve muzâyakaları olmayıp her şey mebzûl ve bâ-husûs bu sene-i mübârekede kahvenin dahi sinîn-i sâbıkāya nazaran haylice farkı olarak tenâkus-ı fiyatı me’mûl iken el-hâletü hâzihî kahvenin beher yirmi beş dirhemi yirmi sekiz paraya fürûht olunmakda ise de kahveci esnâfı beyninde tevzî‘den dolayı geçende münâza‘a vâki‘ olarak Bâb-ı âlî’ye arzuhâl takdîm edenler beher döğülmüş [25b] yirmi beş dirhem kahveden birer para tenzîle rızâ ve hâhiş-i izhâr etmiş ve mukaddem yedi aylık kahve tevzî‘ olunarak bâdî-i nizâ‘ olan kahvenin tevzî‘ tehîr olunduğuna binâen bunların kendi rızâ ve hâhişiyle tenzîl eyleyecekleri birer paranın tenzîliyle ibâdullâha nef‘i olan maddenin icrâsı lâzım gelmiş ve bu bâbda attâr esnâfına dahi diyecek kalmamış olduğundan kahvenin beher yirmi beş dirhemi ba‘d ez-în yirmi yedi para[ya] satılarak bu bâbda dahi ibâdullâha nef‘i mûcib hâlâtın istihsâli irâde olmağla imdi tüccâr esnâfı huzûrunuza celb ederek işbu fermân-ı âlî târihinden i‘tibâren fîmâ ba‘d ibâdullâha fürûht olunarak kahvenin beher yirmi beş dirheminden birer para tenzîliyle yirmi yedişer paraya fürûht olunmasının beyân ve tefhîm ve içlerinden te‘addî ile hilâf-ı hareket tecvîz ederi olur ise o makūleler her kim ise tedîbât-ı lâyıkası icrâ olunmak üzere isim ve şöhretiyle Bâb-ı âlî’ye i‘lâmâ müsâra‘at ve ol vechile tüccârın hâhişleri üzere bundan böyle yirmi beş dirhem kahvenin yirmi yedişer paraya ibâdullâha fürûhtu husûsu tanzîme mübâderet eyleyesin deyü. Fî 16 R sene [1]240.