İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 171 Hüküm no: 52 Orijinal metin no: [25b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’da yangınların önüne geçebilmek için alınması gereken tedbirler İstanbul kādısı fazîletlü efendi. Âsitâne-i sa‘âdet ve havâlîsinde ne‘ûzübi’llâhi te‘âlâ zuhûr eden harîkden ekserîsi ocak kurumlarından neş’et edip ehl-i mahalle ve ashâb-ı büyût ocaklarının bacalarını ve habbâz ve simidci ve şekerci ve helvacı misilli kârlarında ateş isti‘mâl eden esnâf tâifesi fırınlarını aralık aralık tathîr ve gecede ve gündüzde yakıp tahaffuz levâzımını icrâ eylemeleri lâzıme-i zimmetleri ve bu husûsa takayyüd-i zâbitânın dahi muktezâ-yı me’mûriyetleri olmak hasebiye bu def‘a izzetlü Yeniçeriağasına ve Bostancıbaşı ağaya ve Cebebaşı ağaya mahsûs beyaz üzerine buyruldular neşriyle bu emr-i ehemme ihtimâmları tenbîh ve tekîd olunmuş olmağla imdi siz dahi mahallât imâmlarını ve esnâf kethüdâları vesâir iktizâ edenleri huzûrunuza celb ve cem‘ edip ahâlî-yi mahalle ve ashâb-ı büyût hâneleri ocaklarının bacalarını süpürdüp kurumlarını alâmeti’çün kapıları önüne ilkā ve habbâz ve simidci ve şekerci ve helvacı misilli ateş isti‘mâl eden esnâfın dahi fırınlarını gereği gibi tathîr eylemelerinden başka gecede gündüzde verengüşâ-yı teyakkuz ve basîret ile ocak ve fırınlarda ne‘ûzübi’llâhi te‘âlâ ateş hudûs etmemesi husûsuna takayyüd-i tâm eylemelerini tenbîh ve tekîde mübâderet eyleyesin deyü. Fî gurreti R sene [1]240.