İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 173 Hüküm no: 54 Orijinal metin no: [25b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kadınların sokaklarda Müslümana yakışmayan renkli ve süslü kıyafetlerle gezmelerinin önüne geçilmesi Bâ-sahh-ı âlî. İstanbul kādısı fazîletlü efendi. Tâife-i nisânın ırz ve edebiyle gezip mugāyir-i şer‘-i şerîf vaz‘ ve hareket vukū‘a gelmemesine dikkat-ı lâzımeden ve nisâ tâifesinin dürlü dürlü oymalı ve bed-renk ferâce telebbüs etmemeleri bundan akdem fermân-ı âlî ile iktizâ edenlere tenbîh olunmuş olduğundan me’mûrların icrâ-yı fermân-ı âlîye dikkat eylemeleri îcâb-ı me’mûriyetlerinden iken adem-i dikkatden nâşî bu aralıkda tâife-i nisâdan ba‘zıları ırz ve edebi tebdîl ile ehl-i İslâma yakışmayacak sûreti irtikâb ve dürlü dürlü bed-renk ve oymalı ferâceler ve yüzleri açık a‘cûbe yaşmaklar ile geşt ü güzâr etmekde oldukları meşhûd olup bu keyfiyet mugāyir-i şer‘ ve rızâ ve o makūle ırz ve edebiyle ve Müslimâna yakışır kıyâfetle gezmeyen nisâ tâifesinin men‘i zevcine lâzıme-i zimmet kabîlinden idiği âşikâr olmağla fîmâ ba‘d ol vechile oymalı ve bed-renk ferâce ve açık ve a‘cûbe yaşmak ile tâife-i nisânın gezmemelerini ve ol kıyâfetle görülen her kimin zevce ve müte‘allikātından ise mesûl ve mu‘âkab olacağı husûsunu cümleye i‘lân ve işâ‘at etmelerini eimme-i mahallâtı celb ile tefhîm ve ol vechile nisâ tâifesini uygunsuz kıyâfetle gezmekden men‘a mübâderet eyleyesin deyü. Fî 26 M sene [1]240.