İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 173 Hüküm no: 55 Orijinal metin no: [26a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mürur tezkiresi almak isteyen Rum ve Ermenilerin öncelikle patriklerinden mühürlü tezkire almaları gerektiği Bâ-sahh. İstanbul kādısı fazîletlü efendi. Mukaddem bâ-irâde-i seniyye karâr-gîr olduğu mürûr-ı madde maddesi zâbıta-i kaviyyeye idhâl ve Memâlik-i mahrûsede kâin kâffe-i memâlike başka başka tatbîk mühürleri hakettirilerek mübârek ( ) isbâl olunmuş ve Dersa‘âdet’den taşra memâlike gidenlere dahi tarafınızdan mürûr tezkiresi verilmek üzere nizâm verilmiş olduğundan bu usûlün icrâsına i‘tinâ ve dikkat olunmakda ise de el-hâletü hâzihî velî ni‘metleri olan <> Devlet-i aliyyeye isyân üzere olan Kerpiniş kazâsıyla etrâf karyeleri ve Selnik tarafında olan gâvurlar ol tarafda bir takrîb mürûr tezkiresi alıp Dersa‘âdet’e gelerek bir müddetcik eğlenip bu tarafdan mürûr tezkiresi ahzıyla vilâyetleri tarafına giderek icrâ-yı mel‘anet eylemekde oldukları tebyîn olunmuş olduğundan zikrolunan mahaller gâvurlarının Dersa‘âdet’den kat‘-ı pây-i mel‘anetleri sûretinin istihsâli lâzım gelerek fîmâ ba‘d Dersa‘âdet’den âhar mahalle gidecek Rum ve Ermeni ibtidâ patriklerine gidip nereye gideceğini ve kendinin aslı ne mahalde n olduğunu ifâde eyleyerek patriklerinden bir kıt‘a memhûr tezkire ahz etmek ve ba‘dehû kendinin gideceği mahal ve nereli olduğu tebeyyün eyledikden sonra mu‘tâd üzere tarafınızdan mürûr tezkiresi verilmek ve zikrolunan mahaller re[‘â]yâsından tezkire isteyenler olur ise der-akab ahz ve Bâb-ı âlî’ye <> haber verilmek üzere iktizâsı vechile Rum ve Ermeni patriklerine fermânlar ısdâr olunmuş olmağla fîmâ ba‘d Rum ve Ermeni milletinden taşra gidecek olanlar yedlerinde patrikleri mührüyle memhûr tezkireleri bulunmaz ise mürûr tezkiresi verilmemesi ve isyân eden mahaller re‘âyâsına Rum Patriği tarafından <> tezkire verilip tarafınızdan dahi mürûr tezkiresi almak üzere gelen bulunduğu tezkire verilmeyerek derhâl ahz ve Bâb-ı âlî’ye ihbâr olunması husûsuna kemâliyle dikkat eyleyesin deyü. Fî 22 Ra sene [1]240