İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 177 Hüküm no: 58 Orijinal metin no: [26b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul İhtisab mukataasının bir yıllığına mültezim Mehmed Hamdullah’a verildiği Bâ-tu[ğ]ra İhtisâb. Akzâ kuzâti’l-Müslimîn evlâ vülâti’l-muvahhidîn ma‘deni’l-fazli ve’l-yakīn râfi‘u a‘lâmi’ş-şerî‘ati ve’d-dîn vâris-i ulûmi’l-enbiyâi ve’l-mürselîn el-muhtassu bi-mezîd-i inâyeti’l-Meliki’l-Mu‘în mevlânâ İstanbul kādısı zîdet fezâiluhû tevkī‘-i refî‘-i hümâyûn vâsıl olıcak ma‘lûm ola ki bâ-hatt-ı hümâyûn-ı şevket-makrûnum Darbhâne-i âmirem tarafından zabt ve idâre olunan mukāta‘ât-ı mîrîyemden ihtisâb-ı İstanbul ve tevâbi‘i mukāta‘asının sülüs hissesi Darbhâne-i âmiremde ve diğer sülüsân hissesi müşterekleri uhdesinde olup ötedenberü âhardan zabt ve idâre olunu gelmişiken mukāta‘a-i mezkûreyi işbu bin iki yüz kırk senesi Martı ibtidâsından sene-i merkūme Şubat’ı gāyetine <> değin bir sene-i kâmile yed-i vâhidden zabt ü rabt ve idâre eylemek üzere deruhde ve iltizâmına tâlib ve râgıb olan hâlâ mültezimi kıdvetü’l-emâcid ve’l-a‘yân Mehmed Hamdullah zîde mecdühûya bâ-irâde-i seniyyem sâbıkı üzere ma‘a mâl ve kalemiye ve harc-ı aklâm ve fâiz-i mukāta‘a-i mezkûre cem‘an otuz sekiz bin guruş bedel-i iltizâm ile deruhde ve iltizâm ve ibkā olunur mûmâ-ileyhden iltizâm ve kabûl-birle bedel-i iltizâmı olan meblağ-ı mezbûru vakt ü zamânıyla edâ ve teslîm eylemek üzere Darbhâne-i âmirem hazînesine memhûr deyn temessükü vermeğin ber-minvâl-i muharrer mukāta‘a-i mezkûre sene-i merkūmeye mahsûben yed-i vâhidden zabt u rabt ve idâre ve vâki‘ olan mahsûlât ve âidât ve rüsûmâtın kānûn-ı kadîm ve olageldiği üzere cem‘ ve tahsîl ve ahz u kabz eyleyip taraf-ı âhardan müdâhele ve ta‘arruz olunmamak üzere yed-i vâhidden zabtı’çün emr-i şerîfim i‘tâsını ricâl-i Devlet-i aliyyemden hâlâ Darbhâne-i âmirem nâzırı iftihârü’l-emâcid ve’l-ekârim es-Seyyid Ahmed dâme mecdühû memhûr temessük vermeğin mûcebince zabt ettirilmek fermânım olmuşdur. Buyurdum ki hükm-i şerîfim vardıkda ve bu bâbda sâdır olan emrim üzere amel edip dahi senki mevlânâ-yı mûmâ-ileyhsin nâzır-ı mûmâ-ileyhin verdiği temessük mûcebince mukāta‘a-i mezkûreyi iki yüz kırk senesi Martı ibtidâsından sene-i kâmile yed-i vâhidden mültezim-i mûmâ-ileyh tarafından zabt u rabt ve idâre ve vâki‘ olan mahsûlât ve âidât ve rüsûmâtın kānûn-ı kadîm ve olageldiği üzere cem‘ ve tahsîl ve ahz u kabz ettirdip emr-i âlîşânım taraf-ı âhardan müdâhale ve ta‘arruz ettirilmemesi husûsuna mübâderet eyleyesin şöyle bilesin alâmet-i şerîfe i‘timâd kılasın. Tahrîren evâil-i şehr-i Rebî‘ülâhir sene [1]240.