İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 178 Hüküm no: 59 Orijinal metin no: [26b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yetim terekelerinde çıkan altınların kassamlar tarafından Darbhâne’ye teslim edilmesi Bâ-sahh-ı âlî. İstanbul kādısı fazîletlü efendi. Sikke-i hasene-i cenâb-ı pâdişâhî ve düvel-i sâire sikkelerinin meskûk ecnâs-ı altın ve nukūdun fiyat-ı râdde-i müstakarresinden tecâvüz etmemesi kâffe-i mu‘âmelât-ı nâsın ifsâdıyla mehâzîr-i adîleyi müeddî ve erbâb-ı ihtikâr bu madde-i mekrûheyi bir nev‘ kâr ittihâz ederek meskûk zer ü simi ketm ve ihfâ ile fiyatından ziyâdeye alıp vermeyi i‘tiyâd etmiş olduklarından bu keyfiyet mu‘âmelât-ı nâsın ifsâdını ve şîrâze-i nizâma halel tatarrukunu mûcib olduğundan bu kâr-ı mekrûhun külliyen men‘ ve def‘iyle râyic-i nukūd maddesinin istikrârı esbâbının istikmâli lâzıme-i mülkdârîden idiğine binâen bu def‘a dahi iktizâ edenlere bu husûs-ı vâcibü’l-ihtimâm iktizâsına göre fermân-ı âlî ısdârıyla ekîden tenbîh ve hilâfına mücâseretden men‘ ve tahzîr olunmuş ise de fîmâ ba‘d bu husûs etrâflı tutularak revâc-ı nukūdda erbâb-ı ihtikârlar i‘tiyâd eyledikleri fesâdın gereği gibi önü kesdirilmesi lâzımeden ve ma‘rifet-i şer‘-i şerîf ile zabt ve tahrîr oluna gelen emvâl-i eytâm derûnlarında zuhûr eden ecnâs-ı altın ve beyaz akçe ber-mûceb-i nizâm fiyat-ı müstakarresi üzere cânib-i Darbhâne-i âmireye verilmeyerek ketebe-i kısmet ba‘zı usûl-i nâ-makbûleyi irtikâb-birle ecnâs-ı mezkûreyi istedikleri gibi idâneye ibtidâr ve alanlar dahi bir kat dahi zammederek [27a] dağılıp elden ele geçerek nihâyet katî fâhiş fî-ile te‘âmül olunmakda olduğu bi’t-tahkīk ma‘lûm olan keyfiyetden olmakdan nâşî fîmâ ba‘d cânib-i kısmetden tahrîr olunan emvâl-i eytâm içinde zuhûr eden altın ve beyaz akçe bilâ-tevakkuf Darbhâne-i âmireye teslîm ve fiyat-ı mukarreresi üzere ber-vech-i peşin bedelini ahz etmek ve alıp verecekleri nukūdu dahi fiyat-ı mukarreresinden ziyâdeye ahz u i‘tâ eylememek üzere lâzım gelen iktizâsı vechile tekîd ve tenbîh eylemeleri bu def‘a fazîletlü Sadreyn Mahkemesi efendiler hazerâtına ve Bilâd-ı selâse kādılar efendilere ve kassâm efendiye bâ evâmir-i aliyye tenbîh olunmuş olmağla imdi siz dahi keyfiyeti iktizâ edenlere müekkeden tefhîm ve tenbîh ile bu husûsun istikrârı râbıtasının ikmâline mübâderet eyleyesin deyü. Fî 24 M sene [1]240.