İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 179 Hüküm no: 60 Orijinal metin no: [27a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Adlî altının sahtesinin alıp verilmemesi emri Bâ-sahh-ı âlî. İstanbul kādısı fazîletlü efendi. Darbhâne-i âmirede kat‘ ve darb ile tammı on iki ve nısfı altı rub‘u üç guruşa râyic olan Adlî altınını taklîd kabûlünden kurtarmak irâdesiyle hurde yazı ve san‘atla resm ile mukaddemce cedîd sikke ihtiyâr ve bir tarafdan ol vechile kat‘ ibtidâr olunarak yine fiyat-ı mukarreresi üzere tedâvül edip kalb ve mağşûşdan fark ve temyîze ahz u i‘tâda dikkat olunması husûsu her tarafa evâmir-i aliyye ısdârıyla tevcîh ve iş‘âr olunmuş olduğuna binâen husûs-ı mezkûra dikkat cümle me’mûrlara vâcibe-i zimmet ve mütehattim uhde-i me’mûriyet iken bu esnâda zikrolunan Adlî altının tammına ve nısfiyyesine ve fark ve temyîzi müte‘assir katî vâfir kem ayâr altına tedâvül etmekde ve nâs dahi bey‘ ü şirâda bilâ-tevakkuf alıp vermekde olduğundan başka el-hâletü hâzihî taşralardan Darbhâne-i âmireye tevârüd eden hazâinde hayli kalb altın zuhûr etmekde olduğu bu def‘a tahkīk olunup nizâm-ı mülke münâfî ve cümle ibâdullâhın ızrârına bâ‘is ve bâdî bir keyfiyet olduğu zâhir olarak def‘i çaresinin istihsâli lâzım gelmiş olmakdan nâşî fîmâ ba‘d züyûf altın her nerede alınır ve verilir ve ne tarafdan Dersa‘âdet’e gönderilir ise bi’t-tecessüs o mahallin hâkim ve zâbitânı tedîbâta mazhar olacakları bu def‘a Memâlik-i mahrûsede kâin bi’l-cümle eyâlât ( ) evâmir-i şerîfe ısdârıyla ve beyân olunmuş ve keyfiyet iktizâsı vechile lâzım gelenlere fermânla tasdîriyle bildirilmiş olmağla imdi siz dahi keyfiyeti iktizâ edenleri nezdinize celb ile ifâde ve tebeyyün ve her kes alıp verdikleri Adlî altınını kalb ve mağşûşdan fark ve temyîze dikkat eylemelerini gereği gibi gûş-ı hûşlarına ifhâm ve telkīn-birle bundan sonra o misilli kalb ve redî altın her kimin yedinde bulunur ise cevâba kādir olmayarak tedîbât-ı lâyıkaları icrâsında dakīka fevt olunmayacağını etrâfıyla ifâdeye kemâliyle dikkat ve bi’l-cümle ecnâs-ı altın ve nukūd vesâirenin dahi fiyat-ı mukarreresinden ziyâdeye alınıp verilmesine mezîd ihtimâm ve mübâderet eyleyesin deyü. Fî 7 Ra sene [1]240.