Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 392 Hüküm no: 454 Orijinal metin no: [73a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şenadono v. Panayot’un oğullarına yeni vasî tayini Mahmiye-i İstanbul’da el-Hâc Hüseyin mahallesi sükkânından olup medîne-i Edirne’de müsâfiren sâkin iken bundan akdem hâlik olan Şenadono v. Panayot nâm zimmînin sulbî sagīr oğulları Yamandi ve Panayot’un tesviye-i emirlerine savb-ı şer‘den mansûb vasîleri olan ammileri olan Todori v. Panayot hâlik olmağla sagīrân-ı mezbûrânın tesviye-i emirlerine kıbel-i şer‘den bir vasî nasb ve ta‘yîn olunmak lâzım ve mühim ve işbu hâzır bi’l-meclis Nikola v. Kiryaki vesâyet-i mezbûre uhdesinden gelmeye her vechile kādir olduğu sikāt-ı makbûlü’l-kelimât ihbârlarıyla müte‘ayyin olmağla hâkim-i muvakki‘-i sadr-ı kitâb -tûba-lehü ve hüsnü me’âb- hazretleri dahi merkūm Nikola’yı sagīrân-ı mezbûrânın tesviye-i emirlerine kıbel-i şer‘den vasî nasb ve ta‘yîn eyledikde ol dahi kabûl ve merâsimini edâya ta‘ahhüd etmeğin mâ hüve’l-vâki‘ bi’t-taleb ketb olundu. Fi’l-yevmi’s-sânî min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: El-Hâc Mustafa b. Veli, İbrahim b. Ahmed, Kostantin, Papa Todori, Tiryako v. ( ).