İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 182 Hüküm no: 63 Orijinal metin no: [28a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Paskalya sebebiyle alınan tedbirler Bâ-sahh-ı âlî. İstanbul kādısı fazîletlü efendi. Makarr-ı hilâfet-i hazret-i cihândârî olan Âsitâne-i devlet-âşiyân ve havâlîsinde ba‘zı mahallerde tâife-i Nasârânın beyza-i sürh ve Paskalya tâ‘bir olunur bed-nâmları dâhil olduğu günlerden ehl-i İslâma mahsûs elbise ile esvâk ve bâzârda geşt ü güzâr ve münâfî-yi tavr-ı ra‘iyyet harekât-ı münkireye ictisâr eylemelerinin men‘ ve def‘i lâzımeden olmağla imdi Âsitâne-i sa‘âdet derûnunda ve çarşı ve esvâkda tâife-i Rum ve Ermeniyânın bed-nâmları dâhil olduğu eyyâm-ı ma‘dûdede kendi ırzları ve siyâb-ı mahsûsalarıyla geşt ü güzâr ve münâfî-yi tavr-ı ra‘iyyet harekât-ı gayr-ı marziyyeden mübâ‘adet ve ictinâb eylemek ve mukaddemâ bâ-fermân-ı âlî men‘ ve zecr olundukları kebîr kalpak ve elbise-i sâireyi ilbâs ve birbirleriyle mücâdele ve münâkaşa eylememek üzere tehdîd-i şedîd eylemeleriçin tenbîhi lâzım gelenlere tenbîh eyleyesin deyü. Fî 17 Ş sene [1]240.