İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 199 Hüküm no: 71 Orijinal metin no: [30a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mora muhacirlerine ev kiralanması ve kömür yardımı yapılması Bâ-sahh-ı âlî. İstanbul kādısı fazîletlü efendi. Mora muhâcirlerine dâir. Mora muhâcirîninden olup yirmi hâne i‘tibârıyla Hazret-i Ebâ Eyüb-i Ensârî radiye anhu’l-Bârî hazretlerinin civârında vâki‘ merhûme cennet-mekân Hadice Sultan tâbe serâhu[â] hazretlerinin sarayına yerleşdirilmiş ise de harâb olmak cihetiyle eyyâm-ı şitâda barınamayacakları bedîdâr olduğundan Havâss-ı refî‘a kādısı fazîletlü efendi ile bi’l-muhâbere Eyüb-i Ensârî ve Topkapı ve Yenibahçe ve Koca Mustafa Paşa civârlarında olan mahallât imâmları celb ile mâhiyesi onar guruşa olmak üzere birer hâne istikrâ ve tedârik ile iskân olunmaları münâsib görünmüş <> ve sâlifü’z-zikr yirmi hânenin beherine yirmi beşer guruşdan kömür-bahâ olmak üzere beş yüz ve tutulacak yirmi hânenin altışar aylığı olarak bin iki yüz guruş ki cem‘an bin yedi yüz guruş tarafınıza irsâl olunmuş olunmağla imdi ber-vech-i muharrer muhâcirîn için efendi-i mûmâ-ileyh ile bi’l-muhâbere mahâll-i merkūmede iktizâsına göre hâneler tedârik ile mâhiyesi onar guruşdan altmış guruş altışar aylık olmak üzere tutulan hâneler ashâbına ve beher hâneye kömür-bahâ olmak üzere yirmi beşer guruş dahi muhâcirîn-i merkūmenin kendilerine i‘tâ ederek tanzîmine mübâderet eyleyesin deyü. Fî 22 S sene [1]241.