Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 393 Hüküm no: 455 Orijinal metin no: [73a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Resul Reis b. Mehmed’in arpa taşıma ücretini tamamen aldığı Sefîne reislerinden olup mahrûse-i Galata’ya tâbi‘ Tophâne kasabasında To[m]tom mahallesinde sâkin el-Hâc Resul Reis b. Mehmed meclis-i şer‘-i şerîf-i enverde bin doksan altı senesine mahsûb olmak üzre arpa iştirâsına me’mûr olan fahrü’l-âşiyân Hüseyin Ağa b. Veli tarafından husûs-ı câ’i’z-zikre vekîl-i müsecceli olan el-Hâc Ali b. Abdullah mahzarında ikrâr ve takrîr-i kelâm edip müvekkil-i merkūm Hüseyin Ağa yedinden sene-i mezbûreye mahsûb olmak üzre Bartın kazâsından iştirâsı fermân olunan üç bin üç yüz elli keyl-i İstanbulî arpayı fermân mûcebince İsakca’ya nakl için beher keyli sekizer akçe navl ile sefîneye tahmîl ve navl-ı mezbûrun nısfını ber vech-i peşîn bana edâ ve teslîm ettiğinden sonra ben dahi mârrü’z-zikr beheri arpayı getirip Vidin iskelesinde kabzına me’mûr olan kapıcıbaşı fahrü’l-emâsil Yusuf Ağa’ya teslîm ve zimmetine teslîm ettiğimden sonra bâkī kalan nısıf navl-ı mezbûr olan on üç bin dört yüz akçeyi dahi vekîl-i merkūm el-Hâc Ali yedinden tamâmen ahz u kabz eyledim min ba‘d hesâb-ı mezbûr üzre mârrü’z-zikr [73b] üç bin üç yüz elli keyl-i İstanbulî arpa navlı olan cem‘an yirmi altı bin sekiz yüz akçeden merkūm Hüseyin Ağa yedinde ve zimmetinde bir akçe ve bir habbe hakkım bâkī kalmamışdır dedikde gıbbe’t-tasdîki’l-vicâhî mâ hüve’l-vâki‘ bi’t-taleb ketb olundu. Fi’l-yevmi’l-hâdî aşer min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: El-Hâc İsmail b. Abdullah, Hasan Resul b. Mustafa, İbrahim Çelebi b. Ahmed, Mehmed b. İdris.