İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 200 Hüküm no: 74 Orijinal metin no: [30b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mora muhacirlerine kiralanan evler ve yapılan kömür yardımı Bâ‘is-i tastîr-i oldur ki; Mora muhâcirînin menzil kirâları defteri. Mora muhâcirlerinden olup yirmi hâne i‘tibârıyla Ebâ Eyüb-i Ensârî radiye anhu rabbühü’l-Bârî hazretlerinin civârında vâki‘ merhûme cennet-mekân Hadice Sultan tâbe serâhâ hazretlerinin sarayına yerleşdirilmiş ise de harâb olup eyyâm-ı şitâda barınamayacaklarından Havâss-ı refî‘a kādısı fazîletlü efendi ile bi’l-muhâbere Eyüb ve Topkapı ve Yenibahçe ve Koca Mustafa Paşa civârlarında vâki‘ mahallât imâmları celb [ile] mâhiyesi onar guruşa olmak üzere birer hâne istikrâ ve iskân ve sâlifü’z-zikr yirmi hânenin beherine yirmi beşer guruşdan kömür-bahâ olarak beş yüz ve tutulacak yirmi hânenin altışar aylığı olarak bin iki yüz guruş ki cem‘an bin yedi yüz guruş irsâl olunmuş olunmağla ber-vech-i muharrer husûs-ı mezkûrun tazmînine mübâderet olunmak meâlinde işbu sene-i mübâreke Saferi’l-hayrı’nın yirmi ikinci günü târihiyle müverrah bâlâsı sahh-ı âlî ile muveşşah beyaz üzerine bu dâ‘i-yi sıdk-murâ‘îlerine hitâben sâdır olup tescîl olunan fermân-ı ihsân-unvânlarına imtisâlen zikrolunan muhâcirînin kādı-yı mûmâ-ileyh dâ‘îleriyle bi’l-muhâbere bi’l-müzâkere şehr-i Rebî‘ülevvel’i gurresinden Şa‘bâni’l-mu‘azzam gāyetine değin iktizâ eden kirâları istikrâ olunan menâzil ashâbına ve kömür-bahâları dahi muhâcirînin yedlerine i‘tâ olunarak tanzîm ve tesviye olunan defteridir ki ber-vech-i âtî zikr olunur. Fî-evâili şehri Rebî‘i’l-evvel li-sene ihdâ ve erba‘în ve mi’eteyn ve elf. Muhâcirîn-i mezbûrînden Arabacı Hasan Ağa’ya Edirnekapısı dâhilinde vâki‘ Neslişah Sultan mahallesinde İmâm Hüseyin efendi ma‘rifetiyle istikrâ olunan Hüseyin menzilinin gurre-i mezbûreden gāyet-i şehr-i mezkûra gelince altı aylık iktizâ eden icâresi altmış guruş menzil-i mezkûre sâhibi mezbûra ve kömür-bahâsı olarak yirmi beş guruşu dahi mezbûr Hasan Ağa’ya teslîm olunmuşdur. Hâne: 1 aded Muhâcirîn-i mezbûrînden Halil Beşe ve Hâfız Hüseyin bi’l-iştirâk Mi‘mâr Ayas Mahallesi’nde Vezîrodaları’nda beher şehr on beşer guruşa Pabucî Hacı Mehmed Ağa’nın istîcâr olunan menzili gurre-i mezbûreden gāyet-i şehr-i mezkûra gelince altı aylık iktizâ eden icâresi doksan guruş menzil-i mezkûre sâhibi mezbûra ve kömür-bahâsı elli guruşun üzerine menzil icâresinden bâkī kalan otuz guruş zammıyla seksen guruşu dahi mezbûrâna teslîm olunduğu. Hâne: 2 aded Mezbûrûndan Süleyman ve İbrahim Beşe Mi‘mâr Ayas Mahallesi’nde Vezîrodaları’nda vâki‘ Basmacı Ahmed Ağa’nın menzilini bi’l-iştirâk beher şehr on beşer guruşa istîcâr olunup gurre-i mezbûreden gāyet-i şehr-i mezkûra gelince altı aylık doksan guruşu menzil-i mezbûre sâhibi mezbûra ve kömür-bahâsı elli guruşun üzerine menzil-i mezkûre icâresinden bâkī kalan otuz guruş dahi zamla seksen guruş mezbûrâna tamamen teslîm olunmuşdur. Hâne: 2 425 Yalnız dört yüz yirmi beş guruşdur. 1275 +------ 1.700 Zeylde tasrîh olunduğu vechile kādı-yı mûmâ-ileyh tarafına teslîm olunan. Yalnız bin yedi yüz guruşdur. Bâlâda mezkûr yirmi hâneden beş hânesi Âsitâne-i aliyyemde vâki‘ mahallât-ı mezkûrâtda tanzîm ve iskân ettirilip bākī kalan on beş hânenin iktizâ eden kirâsı dokuz yüz guruş ve kömür-bahâları üç yüz yetmiş beş guruş ki cem‘an bin iki yüz yetmiş beş guruşu hâlâ Havâss-ı refî‘a kādısı fazîletlü efendi Dâ‘îlerinin ma‘rifetiyle Ebâ Eyüb Ensârî radiye anhu rabbühü’l-Bârî hazretleri mahallâtına iskân ile ber-vech-i muharrer bin iki yüz yetmiş beş guruşu kādı-yı mûmâ-ileyh dâ‘îlerine teslîm olunduğu işbu mahalle şerh verildi.